Almatyda taýda joǵalǵandardy uıaly baılanyssyz izdeıtin qutqarý júıesi ázirlendi
ALMATY.KAZINFORM — Almatyda uıaly baılanys, SIM-karta jáne ınternet bolmaǵan jaǵdaıda da adamnyń ornalasqan jeri týraly málimetti beretin SOS batyrmasy bar qaýipsizdik júıesi ázirlenip, synaqtan ótkizilip jatyr. Ol AG Tag jeke qurylǵysyna negizdelgen.
AG Digital KZ kompanııasy muny Almatynyń Tsıfrlandyrý basqarmasynyń qatysýymen júzege asyryp jatyr.
Qutqarý qyzmetteriniń málimetinshe, jyl saıyn Almaty taýlarynda 1 000-nan astam izdestirý-qutqarý júrgiziledi.
Alaıda kóptegen týrıstik baǵytta uıaly baılanys jelisimen qamtylmaǵan aýmaqtar bar. Bul kómekke muqtaj adamdardyń naqty ornalasqan jerin anyqtaýdy qıyndatady.
— AG Tag qurylǵysy spýtnıktik navıgatsııa arqyly adamnyń koordınattaryn ózdiginen anyqtap, olardy radıobaılanys arqyly qutqarý qyzmetiniń bazalyq stantsııasyna jiberedi. Derekter ár eki sekýnd saıyn jańartylyp otyrady. Al tótenshe jaǵdaı týyndaǵan kezde týrıst SOS batyrmasyn bir ret basý arqyly dabyl belgisin jibere alady. Zardap shekken adamnyń koordınattary jedel kezekshiniń elektrondyq kartasynda kórsetiledi. Qazirgi konfıgýratsııada sıgnal taratý qashyqtyǵy 15 shaqyrymǵa deıin jetedi, — delingen habarlamada.
Júıe qurylǵymen baılanystyń jaı-kúıin baqylaýǵa, sondaı-aq sıgnal joǵalǵan jaǵdaıda onyń sońǵy ornalasqan jerin tirkeýge múmkindik beredi. Bazalyq stantsııa ınternetke jáne uıaly jelilerge qosylmaı-aq avtonomdy rejımde jumys isteı alady.
Joba aıasynda týrısterge jabdyqty eGov Mobile qosymshasyndaǵy QR-kod arqyly berý tetigi de qarastyrylyp jatyr. Saparǵa shyǵar aldynda paıdalanýshy baǵytyn jáne boljamdy qaıtý ýaqytyn tirkep, jeke qurylǵyny ala alady. Al sapar aıaqtalǵannan keıin qurylǵyny qaıtarady.
Almatynyń negizgi týrıstik baǵyttarynda jabdyq beretin 12 pýnkt ashý kózdelgen. Olardyń qatarynda Alma-Arasan, Aıýsaı, Medeý, Kimasar, Kókjaılaý, Butaqty jáne Shymbulaq bar.
Búginde júıe Almatynyń alty taýly baǵytynda, sonyń ishinde Týrıst, Panorama, Býkreev jáne Fýrmanov shyńdary men Úlken Almaty kóli mańynda synaqtan ótti. Tekserý jumystary ártúrli aýa raıy jaǵdaıynda, onyń ishinde bıik taýly aımaqtarda júrgizildi.
Nátıjesinde júıeniń jumys isteý qabileti rastaldy. Qazir odan ári synaqtan ótkizý úshin qurylǵylardyń alǵashqy partııasy daıyndaldy.
2026 jyldyń sońyna deıin pılottyq synaqtardy bastaý josparlanyp otyr.
Aldaǵy ýaqytta bul tehnologııany Almaty taýlarynda ǵana emes, Qazaqstannyń basqa da týrıstik aımaqtary men jetýi qıyn óńirlerinde qoldaný josparlanyp otyr.
Eske salsaq, Almaty taýlarynda bıyl 700 adam qutqarylǵanyn jazdyq.
Sondaı-aq Almatyda taýǵa shyǵarda tirkeletin saıt ashylǵan edi.
