Almatyda taý týrızmin damytýdyń keshendi jospary bekitiledi

ASTANA. KAZINFORM – Týrızm jáne sport mınıstrligi Almaty taý klasteri týrızmin damytýdyń 2025 – 2029 jyldarǵa arnalǵan keshendi josparyn bekitý týraly buıryq jobasyn ázirledi. Qujat «Ashyq NQA» portalynda jarııalandy. 

Qujattyń túsindirme jazbasynda atalǵan jobany qabyldaý Almaty qalasy men Almaty oblysynyń aýmaǵynda jáne tutastaı alǵanda elimizde týrıstik salany damytýǵa, sondaı-aq týrıstik aǵymdy ulǵaıtýǵa septigin tıgizetini aıtylǵan. Sonymen qatar Qazaqstannyń týrızmdi damytý baǵytyndaǵy ustanymyna oń áser etedi, qolaıly ınvestıtsııalyq ahýal jasaıdy. 

Sondaı-aq mınıstrlik joba elimizge teris áleýmettik-ekonomıkalyq jáne quqyqtyq saldarǵa ákelmeıdi dep sendirip otyr. 

Aıta ketsek, Almatyda taý týrızmin damytýǵa arnalǵan besjyldyq keshendi jospardy iske asyrýǵa respýblıkalyq jáne jergilikti bıýdjetten qarajat bólinedi. 

Almaty taý klasteri týrızmin damytý josparynan qandaı nátıje kútiledi: 

- Sheteldik týrıster sanynyń 630 myńnan 1,8 mln adamǵa deıin artýy; 
- Týrızm salasynda jumys isteıtin jandardyń 80,9 myńnan 106 myń adamǵa deıin artýy;
- Jeke ınvestıtsııa kólemi 196,3 mlrd teńgege jetedi;
- Salyqtyq túsimderdiń 90,7 mlrd teńgeden 184,3 mlrd teńgege deıin artýy;

Qujat jobasy 19 aqpanǵa deıin qoǵamdyq talqylaýǵa usynylyp otyr. 

Buǵan deıin bıyl Almaty taýlarynda jańa 3 kempıng-aımaq ashylatyny týraly habarlaǵan edik. 

Eske salsaq, Almatyda kún saıyn 50-den astam qutqarýshy, 12 tehnıka jáne 19 ıt kezekshilikke shyǵyp, tótenshe jaǵdaıǵa tap bolǵan almatylyqtarǵa kómekke barady, onyń ishinde taýǵa shyqqan týrıster de bar.