Almatyda taý shańǵysy klasterin damytýǵa arnalǵan joba jańa kezeńge ótti
ASTANA. KAZINFORM – QR Premer-mınıstri Oljas Bektenov Kazakh Invest Development Ltd. kompanııasy dırektorlar keńesiniń otyrysyn ótkizdi. Onda Prezıdent Joldaýynda qoıylǵan Almatynyń taý shańǵysy klasterin damytý jónindegi mindetter sheńberinde Almaty Superski týrıstik jobasyn júzege asyrý máseleleri qaraldy.
Kazakh Invest Development Ltd. bas atqarýshy dırektory Erjan Erkinbaev álemdik tanymal Pas Grau International (PGI) kompanııasymen birlesip ázirlengen Almaty Superski kýrortynyń jańartylǵan keshendi josparyn tanystyrdy.
Joba taý shańǵysy jabdyqtaryn óndirýde zamanaýı tehnologııalardy paıdalanýdy, klımattyq jáne releftik jaǵdaılardy taldaý úshin spýtnıktik derekterdi qoldanýdy jáne «jasyl» standarttardy engizýdi kózdeıdi. Jobanyń negizine búkil álem boıynsha 120-dan astam kýrorttarda qoldanylatyn úzdik tájirıbeler alynǵan.
Joan Vıladomat qurylys úshin tańdalǵan ýchaskeniń megapolıs mańynda ornalasqany úlken mańyzǵa ıe ekenin atap ótti. Bul týrısterdiń turaqty kelýin qamtamasyz etedi jáne kýrorttyń jumysyn alǵashqy jyldardan-aq óńirde jetekshi orynǵa shyǵarýǵa múmkindik beredi. Onyń aıtýynsha, megapolıste damyǵan ınfraqurylymynyń, ıaǵnı qonaq úıler men meıramhanalardyń jáne kólik qatynastarynyń bolýy tikeleı kýrort aýmaǵynda qurylys salýdy barynsha azaıtpaq.
Keshendi jospardy daıyndaý kezinde ekologııalyq normalarǵa erekshe nazar aýdaryldy. Qujat ornyqty damý qaǵıdattaryna jáne jyl boıǵy ekologııalyq týrızmdi uıymdastyrýdyń zamanaýı tásilderine sáıkes qazaqstandyq jáne halyqaralyq ekologııalyq standarttardy eskere otyryp ázirlengen.
Jobany júzege asyrý nátıjesinde Almatynyń qysqy jáne ekologııalyq týrızm ortalyǵy retindegi halyqaralyq ımıdji nyǵaıyp, qonaq úı bıznesine, kólik jáne qyzmet kórsetý salasyna, sondaı-aq, ShOB-qa ınvestıtsııalar tartylmaq.
Oljas Bektenov nysandy salý kezindegi ekologııalyq normalardy saqtaýdyń mańyzdylyǵyna toqtaldy. Joba ulttyq jáne halyqaralyq zańnamaǵa sáıkes qorshaǵan ortaǵa barynsha az ásermen, óńirdiń tabıǵı tepe-teńdigin saqtaýǵa uqypty qaraı otyryp, qatań túrde júzege asyrylýy tıis ekenin atap ótti.
Otyrys qorytyndysynda Dırektorlar keńesi keshendi jospardy bekitti, endi ol tehnıkalyq-ekonomıkalyq negizdemeni jáne jobalyq-smetalyq qujattamany daıyndaýǵa negiz bolady.
Almaty Superski jobasy elimizde týrızmdi damytýdyń draıveri retinde qarastyrylyp otyr. Ol elimizdiń turǵyndary men qonaqtary úshin jańa múmkindikter ashyp, ekonomıkany ártaraptandyrý jónindegi ulttyq maqsattarǵa qol jetkizýge úles qospaq.
Aıta keteıik, Almatyda shańǵy tebýdi jańa bastaǵandar úshin 35 km-den astam shańǵy trassasy salynady.