Almatyda tárkilengen 180 myńnan astam veıp tegis joıyldy
ALMATY. KAZINFORM – Almatydaǵy arnaıy polıgonda 180 myńnan astam elektrondy temeki joıyldy.
– Almaty boıynsha ekonomıkalyq tergep-tekserý departamenti tergegen qylmystyq ister sheńberinde tárkilengen 180 myńnan astam veıp joıyldy. Іs-sharaǵa memlekettik jáne quqyq qorǵaý organdarynyń, sondaı-aq Almatynyń jastar uıymdarynyń ókilderi qatysty, - dep málimdedi Qarjy monıtorıngi agenttiginiń Almaty boıynsha departamenti.
Vedomstvo tyıym salynǵan ónimderdi joıý – temeki ónimderiniń zańsyz aınalymymen kúres jáne azamattardyń, ásirese jasóspirimderdiń densaýlyǵyn qorǵaý baǵytyndaǵy júıeli jumystyń bir bóligi ekenin atap ótti.
– Qylmystyq is boıynsha kúdiktiler taýarlardy Telegram-arnalar men messendjerler arqyly tanystary men senimdi tulǵalar kómegimen satpaq bolǵan, - dedi Almaty ETTD tergeýshisi Radmır Júsipov.
Qazaqstanda veıpterdi satyp, taratqandarǵa jáne óndirgenderge aıyppul jáne qylmystyq jaýapkershilik qarastyrylǵan.
Eske salaıyq, 2024 jylǵy 19 sáýirde Memleket basshysy Qasym-Jomart Toqaev veıpke tyıym salatyn zańǵa qol qoıǵan edi.