Almatyda 15 jyl jóndeý kórmegen sýburqaqtar jańǵyrtylady
ALMATY. KAZINFORM — Almatynyń 4 iri sýburqaq kesheninde jóndeý jumystary bastaldy.
Olar: Almaty ákimdigi ǵımaratynyń shyǵys jáne batys bóliginde ornalasqan sýburqaqtar, Respýblıka alańyndaǵy sýburqaq jáne Ǵ.Músirepov atyndaǵy teatr ǵımaraty aldyndaǵy sýburqaq. Qala ákimdiginiń málimetine sáıkes, saraptama negizinde bul nysandardyń tehnıkalyq jaǵdaıy nashar kúıde ekeni anyqtalǵan.
Atap aıtqanda, Almaty ákimdiginiń shyǵys jáne batys bóligindegi sýburqaqtar 1979 jyly salynǵan. Bul nysandardyń syrtqy kelbeti 2010 jyly jańǵyrtylǵanymen, búginge deıin kúrdeli jóndeý jumystary júrgizilmegen.
Respýblıka alańyndaǵy sýburqaq ta 1979 jyly salynǵan jáne 2010 jyly shaǵyn jóndeý jumystary júrgizilgen. Degenmen, nysan qazir ınjenerlik júıelerdi tolyq jańartýdy qajet etedi. Al Ǵ.Músirepov atyndaǵy teatr ǵımaratynyń aldyndaǵy sýburqaq 1962 jyly salynǵan. 2009 jyly ol ishinara qalpyna keltirilgen, biraq búginde kúrdeli jóndeýdi qajet etedi.
— Modernızatsııa aıasynda sýburqaqtardyń qurylymdaryn kúsheıtý, ınjenerlik kommýnıkatsııany, sý jabdyqtaýdy, gıdrooqshaýlaýshy qabatty tolyq aýystyrý, nasos stantsııalarymen jáne sý súzý júıelerin jańartý, avtomattandyrylǵan basqarýdy engizý, sondaı-aq jaqyn aýmaqtardy kórkeıtý josparlanǵan, - dep habarlady ákimdikten.
Taǵy bir mańyzdy jumystardyń biri — qala turǵyndarynyń qaýipsizdigin qamtamasyz etý úshin sýburqaq keshenderinde elektr toǵynyń qaýpin boldyrmaıtyn tómen voltty shamdar men qurǵaq sorǵy jabdyqtary ornatylady.
Qurylys-montajdaý jumystary sáýirde bastaldy jáne 2025 jyldyń qazan aıynda aıaqtalady.
Eske salaıyq, byltyr 19 maýsymda Almatyda ál-Farabı atyndaǵy atyndaǵy QazUÝ aýmaǵyndaǵy sýburqaqtyń mańynda jas jigit qaıtys boldy.
Buǵan deıin Respýblıka alańynda ornalasqan sýburqaq keshenderin kúrdeli jóndeýge 4,5 mlrd teńge jumsalatynyn jazǵanbyz.