Almatyda tanymal bilim berý ortalyǵyna qatysty qylmystyq is tergelip jatyr

ALMATY. KAZINFORM – Almatyda Tesla Education bilim berý ortalyǵyna qatysty qylmystyq is qozǵaldy.

Áleýmettik jelide bilim berý ortalyǵyna aqy tólep, balalaryn bergen ata-analar shaǵym bildirgen. Onda ortalyq jumysy bir sátte toqtap qalǵany aıtylady.

Shaǵym jazǵan jeli qoldanýshylary arasynda ortalyqta jumys istegen tálimgerler de bar. Olardyń aıtýynsha, ustazdar birneshe aıdan beri aılyq almaǵan.

Almaty qalasynyń polıtsııa departamenti azamattardyń aryzy negizinde Bostandyq aýdandyq polıtsııa basqarmasy QR Qylmystyq kodeksiniń 190-babynyń 3-bóligi («Іri mólsherde alaıaqtyq») boıynsha isti tergep jatqanyn habarlady.

- Tergeý barysynda oqıǵa mán-jaılaryn jan-jaqty, tolyq jáne obektıvti anyqtaýǵa, sondaı-aq azamattardyń konstıtýtsııalyq quqyqtaryn qorǵaýǵa baǵyttalǵan keshendi tergeý áreketteri júrgizilip jatyr. Іstiń tergelý barysy Polıtsııa departamenti basshylyǵynyń baqylaýynda, - dep habarlady polıtsııadan.

Tesla Education ortalyǵy da atalǵan jaǵdaıda baılanysty túsinikteme berdi.

- Biz eshqaıda jasyrynǵan joqpyz, baılanystamyz jáne máseleni sheship jatyrmyz. Kompanııa eshqashan alaıaqtyq áreketterge barǵan emes jáne qandaı da bir jeke paıda kózdegen joq. Kompanııa ata-analar aldyndaǵy barlyq mindettemelerin tolyq kólemde oryndaıdy. Qazirgi ýaqytta tólemderdi qaıtarýdyń egjeı-tegjeıli ári ashyq kestesi ázirlenip jatyr, - delingen kompanııa málimdemesinde.


Eske salaıyq, Almatyda «asa iri mólsherde birneshe ret jasalǵan alaıaqtyq» aıyby boıynsha «Elge kómek» qaıyrymdylyq qorynyń basshysy Іlııas Sarıev pen «MM Travel» týrıstik kompanııasynyń basshysy Aqtoty Dúıseevaǵa qatysty sot ótip jatyr.