Almatyda tamaǵyna temir kirip ketken balaǵa 1,5 saǵat operatsııa jasaldy

ALMATY. KAZINFORM — Almatylyq dárigerler tamaǵyna qorshaýdyń temiri kirip ketken 9 jastaǵy balany aman alyp qaldy.

Almaty qalalyq Densaýlyq saqtaý basqarmasynyń málimetinshe, tamaǵyna úshkir temir kirip ketken bala jedel járdem brıgadasymen balalar shuǵyl medıtsınalyq kómek kórsetý ortalyǵynyń qabyldaý bólimine jetkizildi. Ákesiniń aıtýynsha, bala velosıpedten temir qorshaýǵa qulap, jaraqat alǵan.

«Balaǵa aralas jaraqat dıagnozy qoıyldy. Jabyq bas súıek-mı jaraqaty, mıdyń shaıqalýy, traheıa men aýyz qýysynyń zaqymdalýy men moıyn jaraqaty. Balanyń moıyn aımaǵynda uzyndyǵy 6 sm jara boldy, odan 4 sm/10 sm ólshemdi bógde zat - metall qorshaý bóligi shyǵyp turdy», – deıdi derigerler.

Balanyń jaǵdaıy aýyr dep baǵalandy. Naýqas jedel túrde ota jasaý bólmesine jetkizildi. Joǵarǵy sheti naızanyń ushy tárizdi bolyp shyqqan metall qorshaýdyń bir bóligin alyp tastaý úshin hırýrgtarǵa 1,5 saǵat qajet boldy.

«Jaraqat nátıjesinde balanyń traheıasy (2 saqınasy jyrtylǵan), qalqansha bezi, tómengi oń jaqtyń artqy qyrtystyq tabaqshasynyń qozǵalǵyshtyǵy, oń jaǵynyń shyryshty qabaty qatty zaqymdalǵan», - deıdi joǵary sanatty dáriger, Ortalyqtyń jaq-bet hırýrgy, Aıda Ýrazaeva.

Qazir balanyń jaǵdaıy turaqty.

Dúısenbi kúni naýqas jansaqtaý bóliminen neırohırýrgııa bólimshesine aýystyryldy, em qabyldap jatyr.