Almatyda taksı júrgizýshilerinen qaryzǵa aqsha alyp, qaıtarmaı júrgen alaıaq ustaldy

ALMATY. KAZINFORM – Almatyda taksıshilerdi aldap júrgen er adam ustaldy.

Almaty qalalyq polıtsııa departamentiniń málimetinshe, 27 jastaǵy S. esimdi azamat qalanyń keminde tórt turǵynyn aldap ketken. Olarǵa 10-15 myń teńge aralyǵynda shyǵyn keltirgen.

«Tergeý barysynda qaskóıdiń taksı shaqyrǵany belgili boldy. Jolda júrgizýshimen sóılesip, onyń senimine kirip, biraz ýaqytqa belgili bir somany qaryzǵa bere turýyn ótinip, jumysqa barǵan soń qaıtaryp berýge ýáde etken. Keıbir taksı júrgizýshileri esh oılanbastan beıtanys jigitke kómektesken. Qazirgi ýaqytta bizge aryzben 4 adam júgindi. Kúdikti ustaldy, – dedi Medeý aýdandyq polıtsııa basqarmasyna qarasty polıtsııa bóliminiń basshysy Ábdinur Tasybaev.

Er adam buǵan deıin de urlyq jasaǵany úshin sotty bolǵany belgili boldy.

«QR QK-niń 201-babyna sáıkes ózge aqparat tergeý múddesine oraı jarııa etilmeıdi. QR Konstıtýtsııasynyń 77-baby 3-bólimi 1-tarmaǵy, QR QK-niń 19-baby 1-tarmaǵyna saı kez kelgen azamat sot sheshimi zańdy kúshine engenge deıin kinásiz dep sanalady», - dep habarlady polıtsııada.