Almatyda taǵy jer silkindi

ASTANA. KAZINFORM — Almaty qalasy TJD baspasóz qyzmetiniń málimetinshe, shkala boıynsha jer silkinisi 2 baldy qurady.

— QR TJM «SBZUǴU» JShS seısmıkalyq stantsııalar jelisi 2024 jylǵy 28 qarashada Astana ýaqytymen saǵat 01:32-de jer silkinisin tirkedi. Shkala boıynsha jer asty dúmpýleri 2 baldy qurady. Jer silkinisiniń epıtsentri Qytaı aýmaǵynda Almaty qalasynan ońtústik-shyǵysqa qaraı 318 km jerde ornalasqan, — delingen habarlamada.

Qalalyq TJD málimetinshe, Almaty 9-10 baldyq seısmıkalyq aımaqta ornalasqan.

— Qalada jyl saıyn 200-ge deıin álsiz, sezilmeıtin jer silkinisi bolady. Bul rette 2-den 4 balǵa deıingi jer silkinisi Almaty úshin fondyq rejım bolyp tabylady, — dep eskertti vedomstvo.

Budan bólek, jer silkinisinen keıin «Qazseldenqorǵaý» ATETÝ mamandary ózen arnalaryn, gıdrotehnıkalyq qurylystardy, kóshkin qaýipti jáne sel qaýipti ýchaskelerdi zertteý boıynsha monıtorıng júrgizdi. Sondaı-aq, tirshilikti qamtamasyz etý nysandaryn aralap, tekserý jumystaryn júrgizdi.

— Tekserý nátıjeleri boıynsha zaqymdaný oshaqtary tabylǵan joq. Qazirgi ýaqytta atalǵan obektiler shtattyq rejımde jumys isteıdi. Qıraýlar men zardap shekkender týraly málimet túspedi. Jaǵdaı turaqty, — delingen taratylǵan habarlamada.

Eske salsaq, buǵan deıin 5 qarashada Almatyda jer silkingeni habarlandy.