Almatyda taǵy eki kitaphana táýlik boıy ashyq bolady
ALMATY. KAZINFORM — 1 naýryzdan bastap Almaly aýdanynda ornalasqan A. P. Chehov atyndaǵy Ortalyq qalalyq kitaphana (Gogol kóshesi, 109) men Naýryzbaı aýdanyndaǵy Almaty kitaphanalarynyń fılıaly (Belger kóshesi, 1B) táýlik boıy jumys isteý rejımine kóshedi.
Qala ákimdiginiń málimetinshe, 2023 jyldyń qyrkúıek aıynan bastap Jambyl atyndaǵy qalalyq jasóspirimder kitaphanasy, Alatau Creative Hub ortalyǵy jáne Muhtar Áýezov atyndaǵy kitaphana oqyrmandarǵa táýlik boıy qyzmet kórsetip keledi. Al bıyl aqpan aıynan bastap bul qatarǵa Qazaqstan jazýshylary kitaphanasy men Rozybakıev kóshesi, 247/7 mekenjaıynda ornalasqan Almaty kitaphanalarynyń fılıaly qosyldy. Sonyń nátıjesinde táýlik boıy jumys isteıtin kitaphanalar sany beske jetip, al 1 naýryzdan bastap olardyń jalpy sany 7-ge deıin artady.
Gogol kóshesi, 109 mekenjaıynda ornalasqan A. P. Chehov atyndaǵy Ortalyq qalalyq kitaphana 1931 jyldan beri úzdiksiz qyzmet etip keledi jáne qalanyń bilim berý men mádenı ómirinde aıryqsha oryn alatyn tarıhı-mádenı nysan sanalady. Ǵımarattyń jalpy aýmaǵy — 1 572,6 sharshy metr, al kitap qory 100 myńnan astam danaǵa jetedi.
Belger kóshesi, 1B mekenjaıynda ornalasqan Almaty kitaphanalarynyń fılıaly 2026 jyly 9 qańtarda ashylǵan. Fılıaldyń mazmundy kitap qory men zamanaýı materıaldyq-tehnıkalyq bazasy ártúrli jas sanatyndaǵy jáne qyzyǵýshylyqtaǵy oqyrmandardyń suranysyn tolyq qamtamasyz etedi. Ǵımarattyń jalpy aýmaǵy — 614 sharshy metr, al kitap qory — 9 myń dana.
— Bul eki kitaphanada da joǵary jyldamdyqtaǵy ınternetke qosylǵan kompıýterler men Wi-Fi jelisi qoljetimdi, Almaty-library kitaphanalyq-aqparattyq júıesi jumys isteıdi, sondaı-aq RFID qaqpalary men ózine-ózi qyzmet kórsetý termınaldary ornatylǵan. Sonymen qatar, erekshe qajettiligi bar azamattarǵa arnalǵan arnaıy jabdyqtalǵan jumys oryndary qarastyrylǵan. Olar kórý qabileti tómen jáne zaǵıp oqyrmandarǵa arnalǵan Braıl baǵdarlamalary men dybystyq ınterfeıstermen qamtamasyz etilgen, — delingen habarlamada.
Eske salaıyq, 2026 jylǵy aqpan aıynan bastap Áýezov aýdanyndaǵy Qazaqstan jazýshylary kitaphanasy jáne Bostandyq aýdanyndaǵy Almaty Kitaphanalarynyń fılıaly 24/7 rejıminde qyzmet kórsetetinin jazǵanbyz.