Almatyda taǵy eki baǵyt boıynsha avtobýstar jańardy

ALMATY. KAZINFORM – Búginnen bastap №16 jáne №50 baǵyttar boıynsha avtobýstar jańaryp, jyljymaly birlikter sany artty.

«№16 baǵytta «Asyl arman» shaǵyn aýdany – Ortalyq mádenıet jáne demalys saıabaǵyna baratyn avtobýstar sany 15-ten 25 birlikke deıin, al №50 baǵyttaǵy «Aısha bıbi shaǵyn aýdany - Baısultanov kóshesine» qatynaıtyn kólik sany 10-nan 25 birlikke deıin artty»,- dep habarlady qalalyq ákimdikten. 

Yutong markaly gazben júretin 12 metrlik jańa avtobýstar zamanaýı jabdyqpen jabdyqtalǵan. Atap aıtar bolsaq, aýabaptaǵysh, beınebaqylaý júıeleri jáne telefondardy zarıadtaýǵa arnalǵan USB konnektorlar bar. Sonymen qatar salonǵa aıaldamalardy kórsetetin aqparattyq dıspleı ornatylǵan.

«Al, burynǵy avtobýstar basqa baǵyttardy kúsheıtýge baǵyttalmaq»,-dep atap ótti ákimdikten. 

Buǵan deıin Medeýge baratyn avtobýstardyń jańarǵany týraly jazǵan edik.