Almatyda taǵy da jylý qubyry jarylyp, kósheni ystyq sý basty
ALMATY. KAZINFORM – Almatyda gıdravlıkalyq jelilerdi josparly synaqtan ótkizý kezinde Qazybaev kóshesinde jylý qubyry jaryldy.
Onyń vıdeosy áleýmettik jelide tarady.
«Almaty jylý jelileri» JShS málimetinshe, Qazybaev kóshesiniń boıyndaǵy № 105a úıdiń mańymen ótetin magıstraldyq qubyr ýchaskeleriniń birinde qubyr jaryldy. Zardap shekkender joq.
– Dıametrli 1000 mm bolatyn qubyrdaǵy aqaýdy jedel túrde apattyq brıgada oqshaýlady. Aldyn ala málimet boıynsha jarylystyń sebebi — – qubyrdyń korrozııaǵa ushyraýy. Synaq kezinde barlyq qaýipsizdik sharasy saqtalǵanymen, tótenshe jaǵdaılar bolýy múmkin, – dep habarlady kompanııadan.
Buǵan deıin Almatyda josparly synaq kezinde AlmaU ýnıversıtetiniń janynda jylý qubyry jarylǵan bolatyn.
Kompanııa mundaı jaǵdaı bolǵan kezde óz betinshe áreket etpeýdi, oqıǵa ornynan dereý ketip, telefon arqyly «Almaty jylý júıesine» habar berý kerek ekenin eske saldy.