Almatyda taǵy da QazUÝ stýdenti qaza tapty
ALMATY.KAZINFORM - Ál-Farabı atyndaǵy Qazaq ulttyq ýnıversıtetiniń geografııa jáne tabıǵatty paıdalaný fakýltetinde oqyǵan birinshi kýrs stýdenti mert boldy.
Jelide taraǵan aqparatqa sáıkes, túnde stýdentter arasynda tóbeles bolǵan.
Almaty qalalyq polıtsııa departamenti stýdenttiń ólimine qatysty qylmystyq is qozǵalǵanyn habarlady.
- Atalǵan derek boıynsha Bostandyq aýdandyq polıtsııa basqarmasy qylmystyq is qozǵady. Kúdikti ustaldy, – dep málimdedi polıtsııa departamenti.
Ázirge stýdenttiń qandaı jaǵdaıda qaza tapqany belgisiz. Oqıǵanyń mán-jaıy tergeý barysynda anyqtalady.
Ýnıversıtettiń baspasóz qyzmeti marqumnyń ata-anasy men jaqyndaryna kóńil aıtyp, oqıǵanyń mán-jaıyn quqyq qorǵaý organdary anyqtap jatqanyn málimdedi.
- Ál-Farabı atyndaǵy Qazaq ulttyq ýnıversıtetiniń ujymy geografııa jáne tabıǵatty paıdalaný fakýltetiniń birinshi kýrs stýdentiniń mezgilsiz qazasyna baılanysty ata-anasy men týǵan-týystaryna qaıǵyra kóńil aıtady. Qazir quqyq qorǵaý organdary oqıǵanyń mán-jaıyn anyqtap jatyr. Ýnıversıtet jaǵdaıdyń jan-jaqty ári ádil qaralýyna barynsha qoldaý kórsetedi, – delingen oqý ornynyń habarlamasynda.
Sondaı-aq oqý orny kópshilikti qara jamylǵan otbasynyń qaıǵysyna qurmetpen qarap, resmı rastalmaǵan aqparatty taratpaýǵa shaqyrdy.
Eske salsaq, buǵan deıin de QazUÝ-da stýdent ólimine qatysty qylmystyq is qozǵaldy.
Ǵylym jáne joǵary bilim mınıstri Saıasat Nurbek ál-Farabı atyndaǵy QazUÝ stýdentiniń qaıtys bolýyna qatysty pikir bildirip, ýnıversıtet basshylyǵy marqumnyń otbasyna qajetti kómek kórsetkenin aıtty.