Almatyda taǵy da bazardan órt shyqty

ALMATY. KAZINFORM — Almatynyń áıgili «Altyn orda» bazarynda birneshe nysan órtendi. Tótenshe jaǵdaıdyń beınejazbasy áleýmettik jelide tarady.

Almaty qalasy TJD málimetine sáıkes, bazar aýmaǵyndaǵy bos turǵan ǵımarattan ot shyqqan. Qutqarýshylar oqıǵa ornyna 9:20-da attanǵan.

— 9 qyrkúıek 9 saǵat 20 mınýtta Almaty qalasynyń TJD kúsh-quraldary Naýryzbaı aýdany Tashkent tasjoly, 17/1 mekenjaıyna jiberildi. Kelgen sátte jumys istemeıtin úı-jaıdyń shatyry órtengeni jáne ot onyń janyndaǵy lombard shatyryna taralǵany anyqtaldy. Órt ornynan 1 gaz ballony (50 l) evakýatsııalandy, — dep habarlady qalalyq TJD baspasóz qyzmeti.

15 mınýttyń ishinde órt oqshaýlanyp, 09:48–de joıyldy. Abyroı bolǵanda zardap shekkender joq. 

Órttiń sebebi anyqtalyp jatyr.

Saýda oryndaryna jaqyn bolǵandyqtan oqıǵa ornyna jeke quramnyń 48 qutqarýshysy jáne 14 tehnıka jiberildi

Eske salaıyq, shilde aıynda Almatydaǵy «Baraholka» bazarynyń bir bóligi órtengen edi.