Almatyda taǵy bir zańsyz qurylys nysany buzyldy
ALMATY. KAZINFORM — Osıpenko kóshesinde ornalasqan irgetas ústine metall qurylymnan salynǵan qosymsha qurylys buzyldy. Bul týraly Almatynyń qala qurylysy baqylaý basqarmasynyń mamandary aıtty.
Jospardan tys júrgizilgen tekserý kezinde nysan ıesiniń (jeke tulǵa) kópqabatty turǵyn úıdiń birinshi qabatyndaǵy ǵımaratqa óz betimen qosymsha qurylys júrgizgeni anyqtaldy.
— Atalǵan tulǵaǵa qatysty ákimshilik sharalar qabyldanyp, is materıaldary Ákimshilik quqyq buzýshylyqtar jónindegi mamandandyrylǵan aýdanaralyq sotqa joldandy. 2025 jyly 12 jeltoqsanda osy sottyń qaýlysymen menshik ıesi kináli dep tanylyp, zańsyz salynǵan qurylysty májbúrlep buzý týraly sheshim shyǵaryldy, — delingen habarlamada.
Birer kún buryn sot sheshimin oryndaý maqsatynda nysan ıesi zańsyz qurylysty óz kúshimen buzdy.
Eske salaıyq, buǵan deıin Almatyda 2025 jyly sot sheshimimen zańsyz salynǵan 42 nysan buzylǵanyn habarlaǵanbyz.