Almatyda taǵy bir iri órt shyqty
ALMATY. KAZINFORM – Almatyda bir táýlik ishinde ekinshi iri órt shyqty.
Tótenshe jaǵdaılar mınıstrliginiń málimetinshe, bul joly Almaly aýdanyndaǵy Tóle bı kóshesinde ornalasqan úsh qabatty ákimshilik ǵımarattyń shatyry órtenip jatyr.
– Oqıǵa ornynda órt sóndirý shtaby qurylyp, bes órt sóndirý oqpany berilgen jáne sý úzdiksiz jetkizilip jatyr, - delingen habarlamada.
Órt ekinshi joǵary dárejege jatqyzyldy.
Qazirgi ýaqytta zardap shekkender týraly aqparat joq.
Aıta keteıik, ǵımarat buryn Qazaq KSR Qarjy mınıstrligine tıesili bolǵan.
Eske salaıyq, buǵan deıin Almaty qalasynda órt sóndirýshiler Naýryzbaı aýdany Altyn orda kóshesi boıynda ornalasqan balalar úıindegi órtti sóndirip jatqanyn habarlaǵan edik.
TJM jalynnyń 1000 sharshy metr aýmaqta sóndirilgenin málimdedi.
Almaty ákimdiginiń málimetinshe, oqıǵa ornynan 35 bala men qyzmetkerler der kezinde evakýatsııalandy. Zardap shekkender joq.