Almatyda taǵy bir kitaphana ashyldy
ALMATY. KAZINFORM — Almatyda Táýelsizdik kúnine oraı jańa zamanaýı kitaphana ashyldy.
Saltanatty rásimge Almaty ákimdiginiń ókilderi men birqatar jazýshylar, qoǵam jáne memleket qaıratkerleri, ǵylym men mádenıet ókilderi qatysty. Jańa kitaphana Rozybakıev kóshesi 247-úı, 7- blok mekenjaıynda ornalasqan jáne kúndelikti 08:30–20:00 ýaqyt aralyǵynda demalyssyz jumys isteıdi.
Qala ákimdiginiń málimetinshe, nysan turǵyndarǵa arnalǵan kópfýnktsıonaldy mádenı ári bilim berý alańy retinde jobalanǵan. Odan bólek erekshe qajettilikteri bar azamattar úshin arnaıy beıimdelgen jumys oryndary qarastyrylǵan. Kórý qabileti tómen oqyrmandarǵa arnalǵan iri qariptegi jáne arnaıy formattaǵy ádebıetter qory jınaqtalǵan.
Sonymen qatar zamanaýı kompıýterlik zal, jeke jumys isteýge arnalǵan tynysh oqý aımaqtary, toptyq kezdesýler men shyǵarmashylyq jobalarǵa arnalǵan keńistikter jabdyqtalǵan.
— Kitaphana — qalanyń rýhanı tynysyn aıqyndaıtyn oryn. Biz óz tarapymyzdan qala turǵyndaryna jańa bilim nárin sýsyndaýǵa, jan-jaqty damýyna jaǵdaı jasap otyrmyz. Bul kitaphana — tek kitap oqıtyn oryn ǵana emes, oı men ıdeıa toǵysatyn zamanaýı mádenı ortalyq, — dedi Almaty ákiminiń orynbasary Abzal Núkenuly.
Kitaphananyń erekshe jobalarynyń biri — balalar men jasóspirimderdiń kitap oqýǵa degen qyzyǵýshylyǵyn arttyrýǵa baǵyttalǵan «Oqy — oına» jobasy iske qosyldy. Osy joba aıasynda balalar aımaǵynda PlayStation 5 ornatylǵan. Kitap oqyǵan balalar oıyn konsolyn tegin oınaı alady.
Eske salaıyq, buǵan deıin Almatyda Muhtar Áýezov atyndaǵy kitaphana ashyldy.
Sondaı-aq Kazinform agenttigi Almaty kitaphanalarynan fotoreportaj usynǵan bolatyn.