Almatyda taǵy 8 myń avtoturaq orny aqyly bolady
ALMATY. KAZINFORM – Almatyda aqyly avtoturaq oryndarynyń sany artady.
Qazirgi tańda megapolıste 17 myńnan astam aqyly avtoturaq orny bar. Alaıda osy jyldyń sońyna deıin kólik turaqtaryn uıymdastyrý jáne jol qozǵalysyn retteý maqsatynda qosymsha aqyly turaq oryndaryn kezeń-kezeńimen engizý josparlanyp otyr. Bul týraly agenttik saýalyna jaýap bergen “Almaty parkıng” mekemesi habarlady.
- 2026 jyly qalanyń magıstraldy kóshelerinde qosymsha shamamen 8 myń avtoturaq ornyn aqyly formatqa kóshirý josparlanyp otyr. Bul shara kóshelerdiń ótkizý qabiletin arttyrýǵa jáne turaq keńistigin tıimdi paıdalanýǵa baǵyttalǵan, - delingen jaýapta.
Sonymen qatar “Almaty parkıng” málimetine sáıkes, búginde avtoturaq tarıfterin ózgertý máselesi qarastyrylyp jatyr. Alaıda naqty sheshim qabyldanǵan joq.
- Tarıfterge qatysty kez kelgen ózgerister ákimdiktiń resmı paraqshasynda habarlanatyn bolady, - dep naqtylady mekemeden.
Jalpy qalanyń kommýnaldyq menshigindegi eń kóp avtoturaq orny Almaly aýdanynda ornalasqan - 5363. Odan keıin Medeý (5102) jáne Jetisý aýdandary (3494) tur. Al Alataý aýdanynda - 2637, Bostandyq aýdanynda - 787, Túrksib aýdanynda - 290, Naýryzbaı aýdany — 92, Áýezov aýdany — 60 aqyly avtoturaq orny bar.
Eske salaıyq, Almatyda aqyly turaqtar júıesin reformalaý josparlanyp otyr. Bul týraly jol qozǵalysyn uıymdastyrý jáne jolaýshylar kóligi basqarmasynyń basshysy Erjan Dıhanbaev aıtqan bolatyn. Onyń sózinshe, qazir rezıdenttik abonement júıesin engizý múmkindigi qarastyryldy. Bul bastama boıynsha jergilikti turǵyndar úılerine jaqyn aqyly turaqtarǵa kólikterin tegin qoıa alady.
Keıin Ashyq NQA portalynda «Jol júrisi qaǵıdalarymen rettelmegen bóliginde Almaty qalasynda jol qozǵalysyn uıymdastyrý qaǵıdalaryn bekitý týraly» jobasy usynyldy. Qujattyń mańyzdy tusy — almatylyqtarǵa turǵylyqty jerinen 500 metr radıýsta avtoturaqtar orny tegin paıdalanýǵa beriledi.
