Almatyda sý qorǵaý aımaǵyndaǵy 17 jer ýchaskesi memleket menshigine qaıtaryldy
ALMATY. KAZINFORM — Sot sheshimimen Almatynyń Medeý aýdanyndaǵy Bekenbaı ózeni arnasynyń sý qorǵaý aımaǵynda ornalasqan (Muztaý shaǵynaýdany, burynǵy Býtakovka) jalpy aýmaǵy 7,7 gektardan asatyn 17 jer ýchaskesi memleket menshigine qaıtaryldy. Bul týraly qala ákimdiginiń baspasóz qyzmeti habarlady.
— Almaty ákimdiginiń jerdi paıdalaný máselesine júrgizip otyrǵan júıeli monıtorıng jumystarynyń arqasynda jer telimderi memleket menshigine qaıtaryldy. Tekserý barysynda atalǵan jer ýchaskelerindegi jyljymaıtyn múlik nysandarynyń kadastrlyq tólqujattaryn rásimdeý kezinde zańbuzýshylyqtar anyqtaldy, — delingen habarlamada.
Tekserý qorytyndysy boıynsha Almatynyń jer resýrstaryn basqarý departamenti 17 jer ýchaskesine qatysty sáıkestendirý qujattarynyń kúshin joıý týraly nusqama shyǵardy. Alaıda nusqama talaptary oryndalmaǵandyqtan, departament Almaty qalasynyń mamandandyrylǵan aýdanaralyq ekonomıkalyq sotyna talap-aryzben júgindi.
Sot talap-aryzdy tolyq kólemde qanaǵattandyrdy. Sot sheshimi zańdy kúshine engennen keıin jer telimderi memleket menshigine qaıtaryldy.
Almaty ákimdigi qoldanystaǵy zańnama talaptaryna sáıkes zańsyz rásimdelgen jer ýchaskelerin anyqtaý jáne olardy memleket menshigine qaıtarý jumystaryn jalǵasyp jatqanyn málimdedi.
Eske salaıyq, buǵan deıin Almatyda 14 gektardan astam paıdalanylmaı jatqan jer memleketke qaıtarylǵanyn habarlaǵanbyz.
