Almatyda sýǵa túsýge bolmaıtyn 9 sý qoımasy ataldy

ALMATY. KAZINFORM - Sýǵa shomylatyn maýsym kezindegi qaýipsizdikti kúsheıtý maqsatynda Almatyda «Mamyr qaýpi» keshendi is-sharalar jospary bekitildi.

Almaty qalasy Tótenshe jaǵdaılar departamentiniń málimetinshe, qala aýmaǵy men taýǵa jaqyn jerlerde ornalasqan 44 sý qoımasynyń 9-y sýǵa túsýge qaýipti. Olar:

1. «Shańyraq» yqsham aýdanyndaǵy Úlken Almaty ózeni – Alataý aýdany;

2. «Darhan» yqsham aýdanyndaǵy Úlken Almaty ózeni – Alataý aýdany;

3. Ál-Farabı men Navoı kósheleri mańyndaǵy Úlken Almaty ózeni - Bostandyq aýdany;

4. «Kemel» yqshamaýdanyndaǵy «Pervomaıskıe prýdy» – Jetisý aýdany;

5. Kishi Almaty ózeni (Býtakovkaǵa buryla bergende) – Medeý aýdany;

6. ıÝnnatskoe ózeni – Medeý aýdany;

7. «Qarasý» yqsham aýdanyndaǵy toǵan - Alataý aýdany;

8. Aeroportovskoe ózeni – Túrksib aýdany;

9. Qarasý jaqtaǵy ózen (Shestýha) – Túrksib aýdany.

- Tórt jerde – Saıran kóliniń batys jáne shyǵys jaǵynda, «Gúlder» demalys orny men «Baým» baǵynyń aýmaǵyndaǵy jaǵajaıda ǵana sýǵa túsýge ruqsat. Biraq qazir bul sý qoımalary sýǵa tola qoımaǵan. Saıran kólinde byltyrdan beri jaǵalaýdy abattandyrý jumystary júrip jatyr. D.Qonaev atyndaǵy Úlken Almaty ózeni gıdrotehnıkalyq qurylymdar kúrdeli jóndeýden ótip jatyr,- dedi Almaty qalasy TJD Azamattyq qorǵanys basqarmasynyń bastyǵy Qýanysh Ospanov.

Sonymen birge ol byltyrdan beri qaýipti sý qoımalaryna kameralar qoıylyp, olardy arnaýly kompıýterlerde sýdaǵy qutqarý qyzmetiniń mamandary baqylap otyratynyn atap ótti. Kameradaǵy beınelerdi qutqarýshylar smartfonnan da kórip otyra alady. Jalpy byltyr sýǵa túsýdiń ádep-erejesin óreskel buzǵan 40 adam ákimshilik jaýapqa tartylǵan.

Eske salaıyq, buǵan deıin Qapshaǵaı sý qoımasy ekinshi jyl qatarynan 100% tolǵanyn jazǵanbyz.