Almatyda sýdy paıdalanýǵa qoıylatyn talaptar kúsheıtildi
ALMATY. KAZINFORM - Almatyda sýdy utymdy paıdalaný jáne aǵyn sýlardyń lastanýyn azaıtý sharalary kúsheıtilip jatyr.
«Almaty Sý» málimetinshe, jańa Sý kodeksinde sý resýrstaryn utymdy paıdalaný, sý únemdeý tehnologııalaryn engizý jáne aǵyn sýlardyń lastanýyn azaıtý kózdelgen. Osy baǵyttaǵy sharalardyń biri – sýdy kóp tutynatyn nysandarda sýdy qaıta paıdalaný júıelerin engizý.
— Jyl basynan beri Almatydaǵy 300 avtojýý orny alǵash ret aınalymdy sýmen jabdyqtaý júıelerimen jabdyqtaldy. Sonymen qatar ortalyq káriz júıesine tógiletin óndiristik aǵyn sýlarǵa jáne jergilikti tazartý qurylystaryn paıdalanýǵa qoıylatyn talaptar kúsheıtilip jatyr. Al qoǵamdyq tamaqtaný oryndarynda, ıaǵnı barlyq meıramhana men kafede maıustaǵyshtardy durys ári ýaqytyly tazalap, talapqa saı paıdalanýdy qamtamasyz etý qajet, — dedi «Almaty Sý» satý departamentiniń dırektory Serik Shagırov.
Onyń aıtýynsha, bul sharalar káriz júıesine túsetin júktemeni azaıtyp, aǵyn sýlardy tazartý sapasyn arttyrýǵa múmkindik beredi.
Aldaǵy ýaqytta «Almaty Sý» sý daıyndaý tehnologııalyq úderisterinde sýdy qaıta paıdalanýdy keńeıtýdi josparlap otyr. Sondaı-aq káriz tazartý qurylystaryn jańǵyrtý aıasynda aǵyn sýlardy tazartý sapasyn arttyrý kózdelgen.
Buǵan deıin «Almaty Sý» kompanııasy 2026 jylǵy 1 qazannan bastap sý tarıfteri ózgeretinin habarlady.
