Almatyda sý únemdeý tehnologııasyn engizbegen kólik jýý oryndary sýdan ajyratylyp jatyr
ALMATY. KAZINFORM — Almatyda kólik jýý oryndary sý únemdeý jáne qoldanylǵan sýdy qaıta paıdalaný tehnologııasyn qanshalyqty paıdalanyp jatyr? Kazinform tilshisi anyqtap kórdi.
2024 jyly Almatyǵa jumys sapary kezinde Memleket basshysy Qasym-Jomart Toqaev baý-baqshany sýarý men kólik jýý úshin aýyz sýdy paıdalanýǵa bolmaıtynyn aıtty. Prezıdent tapsyrmasynan keıin qaladaǵy jaǵdaı qalaı ózgergenin anyqtaý úshin qala ákimdigine júgindik.
Resmı saýalǵa Almaty qalasy energetıka jáne sýmen jabdyqtaý basqarmasyna qarasty «Almaty Sý» kásiporny jaýap berdi. Olardyń málimetinshe, megapolıstiń kólik jýý oryndarynda sýdy únemdeý jáne sýdy qaıta paıdalaný tehnologııasyn engizý úshin 427 nysanǵa tehnıkalyq talaptar jiberilgen. Onyń ishinde 152 kólik jýý nysany talaptardy oryndap, qajetti tehnologııalardy engizgen.
— Sý kodeksiniń negizgi qaǵıdattarynyń biri sýdy utymdy jáne tıimdi paıdalaný. Al QR Sý kodeksiniń 18-baby 2-tarmaǵynyń 10-tarmaqshasyna sáıkes, sý tutynýshylar sý únemdeý tehnologııalaryn, sýarýdyń progressıvti tehnıkasyn, aınalymdy jáne (nemese) qaıtalama sýmen jabdyqtaý júıelerin engizýge, sýdyń ónimsiz ysyrabyn azaıtýǵa mindetti, — dep túsindirdi kásiporyn.
«Almaty sý» zańnamada kórsetilgen talaptardy oryndamaǵan nysandy ortalyqtandyrylǵan sý júıesinen ajyratýǵa nemese shekteýge quqyly ekenin atap ótti. Bıyl qalada 68 kólik jýý ornyn sýmen jabdyqtaý qyzmetteri ýaqytsha toqtatylǵan. Tehnıkalyq talaptar oryndalǵan kezde olarǵa sý berý qaıta jandanady.
Odan bólek kásiporyn sýdy paıdalanýdyń tıimdiligin arttyrý jáne sý joǵaltýdy azaıtý maqsatynda sý únemdeý jáne tsıfrlyq tehnologııalardy engizý júzege asyrylyp jatqanyn málimdedi. Olardyń qataryna sý tutynýdy esepke alýdyń avtomattandyrylǵan júıeleri, jelilerdiń tehnıkalyq jaı-kúıin monıtorıng jasaý jáne sý sapasyn baqylaý jumystary kiredi. Sondaı-aq sý resýrstaryn utymdy paıdalanýǵa tutynýshylardy yntalandyrý maqsatynda Almaty qalasynda tutyný normalary boıynsha saralanǵan «áleýmettik normalar» engizildi.
— Bul rette sýdy únemsiz paıdalanatyn jáne sý esepteý aspaptary joq tutynýshylar úshin tarıfter joǵary deńgeıde belgilenedi. Al sý eseptegish quraldary joq tutynýshylar úshin sý tutynýdyń jańa normalary qabyldandy. Atalǵan normalar 1989 jyldan beri alǵash ret ózgertildi. Nátıjesinde turǵyn úılerdi sý esepteý aspaptarymen jabdyqtaý deńgeıi 2024 jyldan beri 63%-dan 85%-ǵa deıin artty, — delingen kásiporyn jaýabynda.
Eske salaıyq, Almatyda «Taza Qazaqstan» tujyrymdamasyn 2025–2029 jyldary júzege asyrý josparyna sáıkes, «Jasyl mektep» jobasyn iske qosý josparlanǵan. Ol boıynsha oqýshylar arasynda sý únemdeý taqyrybynda synyp saǵattary ótkiziletin bolady.