Almatyda sý tutyný talaptaryn buzýdyń júzden astam deregi anyqtaldy
ALMATY. KAZINFORM – Almatyda sýyq sýmen jabdyqtaý jáne káriz qyzmetin tutynýshylardy keshendi tekserýdiń belsendi kezeńi bastaldy. Bul týraly qalalyq Energetıka jáne sýmen jabdyqtaý basqarmasynyń mamandary aıtty.
«Almaty Sý» MKK mamandarynyń málimetinshe, is-sharalar kezinde abonentterdiń sý jáne káriz qyzmetterin paıdalaný qaǵıdalaryn saqtaý deńgeıi nazarǵa alynady. Zańsyz qosylý, esepteý quraldarynyń jumysyna aralasý jáne tutyný kólemin ádeıi tómendetý faktilerin anyqtaýǵa basymdyq berilip otyr.
Sonymen qatar mamandar ınjenerlik jelilerdiń tehnıkalyq jaı-kúıin de baǵalap jatyr.
— Túgendeý jumystary qalanyń barlyq aýdanyn qamtıdy. Tıimdilikti arttyrý úshin aýmaqtar jeke sektorlarǵa bólinip, sol jerlerde mobıldi toptar jumys isteıdi, — delingen habarlamada.
«Almaty Sý» ókilderiniń aıtýynsha, iri sý tutynýshylar erekshe baqylaýǵa alynǵan. Olardyń qatarynda monsha, kólik jýý beketi, qoǵamdyq tamaqtaný oryndary, saýda ortalyqtary, ónerkásip kásiporyndary bar. Bul nysandar úshin sýdy qaıta paıdalaný júıeleri men jergilikti tazartý qurylystarynyń bolýy mindetti talap retinde qarastyrylǵan.
Anyqtalǵan barlyq zań buzý boıynsha qoldanystaǵy zańnamaǵa sáıkes sharalar qabyldanady.
Olar tutyný kólemin qaıta esepteýden bastap, qyzmet kórsetýdi shekteý nemese tolyq toqtatýǵa deıingi tetikterdi qamtıdy.
Reıdtik is-sharalardyń alǵashqy aptalarynda-aq júzden astam zań buzý anyqtaldy. Eń jıi kezdesken derekter:
• kelisimshartsyz sýdy paıdalaný;
• esepteý quraldarynyń jumysyna aralasý;
• tazartylmaǵan aǵyn sýlardy tógý;
• qoǵamdyq tamaqtaný oryndarynda maı ustaǵyshtardyń bolmaýy.
2026 jyldyń birinshi toqsanynda 29 kólik jýý beketi alǵash ret sýdy qaıta paıdalaný júıelerin ornatty. Buǵan qosa, buryn turmystyq tarıfpen tólem jasap kelgen 78 nysan kommertsııalyq tarıfke aýystyryldy. Sondaı-aq, ınjenerlik jelilerge óz betinshe qosylýdyń 20-dan astam deregi anyqtaldy.
Eske salaıyq, buǵan deıin Almatynyń taýly aımaǵynda aýyz sý máselesi qalaı sheshilip jatqany jaıly jazǵanbyz.
