Almatyda sý tasqyny bolady dep alańdaýǵa negiz joq – mamandar
ALMATY. KAZINFORM – Almatyda qalalyq qyzmetter kóktemgi sý tasqynyna daıyndyqty pysyqtap jatyr.
Almaty ekologııa jáne qorshaǵan orta basqarmasy basshysynyń orynbasary Arshat Baqtygereevtiń aıtýynsha, sý tasqyny bolady dep alańdaýǵa negiz joq, turǵyn úı sektory men ınfraqurylym nysandaryn kóktemde sý basatyn qaýip te edáýir azaıǵan.
Almaty aýmaǵynda 153 sý nysany – onyń ishinde jalpy uzyndyǵy 586,2 shaqyrym bolatyn 109 sý arnasy men 44 sý aıdyny bar. Qalada 29 tireý gıdrotehnıkalyq qurylysy jumys isteıdi, olardyń jeteýi jóndeýdi qajet etedi, sonyń ishindegi altaýy kommýnaldyq menshikte eken.
– Qaladaǵy erigen sý men jańbyr sýynyń aǵysyn qamtamasyz etetin uzyndyǵy 1 525 shaqyrym bolatyn aryq jelisi bar. Sý bógeles úshin aryq pen ótkelderdi kún saıyn tazartyp otyrady. Sý jaıylyp jatsa, 52 brıgada jedel jumys isteýge taǵy daıyn otyr, - dedi Arshat Baqtygereev.
Qazir qalanyń ortalyq, shyǵys jáne batys bóliginde aryq jelisi men nóser kárizin salyp, ony qaıta jańǵyrtý jobasy qolǵa alynyp jatyr.
Osy joly qalanyń ortalyq bóliginde jumystar tolyq aıaqtalyp, 158 ýchaskede 76,6 shaqyrym aryq jelisi qaıta jańǵyrtyldy.
Shyǵys jaqtaǵy uzyndyǵy 26,2 shaqyrym bolatyn 58 jerdegi jumys ta aıaqtaldy, bıyl qosymsha 30 jerdegi 7,6 shaqyrymda osyndaı jumys isteledi.
Batys bóliginde qazirgi ýaqytta 9,3 shaqyrym jumys atqaryldy, 2026 jylǵa jospar – 41,7 shaqyrym.
2026 jylǵy sý tasqyny kezeńinde tótenshe jaǵdaıdyń aldyn alý úshin 1 867 adamnan, 775 birlik tehnıkadan, 119 motopompa men 6 júzý quralynan turatyn kúshter men quraldar daıyndaldy. 23 500-den astam qap pen 17 843 tonna ınertti materıal qory jasaqtaldy, sondaı-aq qalqalar men ýaqytsha ornalastyratyn oryndar jaǵy da qazirden ázirlenip qoıylǵan.
Sý tasqyny kezeńine arnaýly qyzmetter saqadaı saı otyr.
Eske salaıyq, buǵan deıin Almaty oblysynda 10-nan astam eldi mekenge sý tasqyny qaýpi tónip turǵanyn jazǵanbyz.