Almatyda sý men jylýdy tutynýdyń áleýmettik normasy engizildi

ALMATY. KAZINFORM – Ulttyq ekonomıka mınıstrligi tabıǵı monopolııalardy retteý komıtetiniń Almaty qalasy boıynsha departamentiniń bólim basshysy Ardaq Jańabaeva resýrs únemdeýdi yntalandyrý boıynsha jańa sharalardy - tutynýdyń áleýmettik normalaryn engizý jobasyn túsindirdi.

– Sý resýrstaryn tutyný mádenıetin arttyrý jáne tutynýshylardy sýdy jáne jylýdy únemdeýge yntalandyrý úshin tabıǵı monopolııalar týraly zańnamaǵa «tutynýdyń áleýmettik normalary» uǵymy engizildi. Olar «neǵurlym kóp únemdeseńiz, soǵurlym az tóleısiz» qaǵıdaty boıynsha sýmen jabdyqtaý jáne jylýmen jabdyqtaý qyzmetterin tutyný kólemine baılanysty joǵary tarıfterdi belgileýge baǵyttalǵan, – dep atap ótti ol.

Onyń aıtýynsha, sýmen jabdyqtaýda tarıfterdiń tórt deńgeıli júıesi qoldanylady: 3 tekshe metrge deıin - aǵymdaǵy tarıf; 3 - ten 5 tekshe metrge deıin - +20%; 5-ten 10 tekshe metrge deıin - +50%; 10 m³ joǵary jáne eseptegish bolmaǵan jaǵdaıda-qos tarıf.

Sonymen qatar, jylytý úshin normalar turǵyn úıdiń aýdany boıynsha esepteledi: 100 sharshy metrge deıin - bekitilgen tarıf; 100 - den 200 tekshe metrge deıin - +10%; 200 m² joǵary-ortasha tarıf.

Ardaq Jańabaeva saralanǵan tarıfter arqyly túsetin qosymsha qarajat turǵyn úı-kommýnaldyq sharýashylyǵyn jańartý isine jumsalatynyn jetkizdi.

Atap aıtqanda, ınjenerlik jeliler jańartylyp, resýrs únemdeıtin tehnologııalar engiziledi jáne esepteý qurylǵylary ornatylady.

Spıkerdiń aıtýynsha, qazirgi ýaqytta «Almaty Sý» (3,3 mlrd teńgege) jáne «Almaty jylý júıesi» (83 mln teńgege) ınvestıtsııalyq baǵdarlamalardy ózgertýge ótinishter qaralyp jatyr.

– Bul sharalar ınfraqurylymdy damytyp qana qoımaı, turǵyn úı kómegi esebinen az qamtylǵan otbasylardy ataýly túrde qoldaýǵa múmkindik beredi, – dep atap ótti Jańabaeva.

Buǵan deıin Almatyda halyqtyń áleýmettik osal tobyna kommýnaldyq qyzmet tarıfterdiń kóterilýine baılanysty ótemaqy tólenetini týraly jazǵanbyz.