Almatyda sý men káriz tarıfteri nelikten ózgerip jatqany túsindirildi
ALMATY. KAZINFORM – 1 qazannan bastap Almatyda sýmen jabdyqtaý jáne sý burý qyzmetterine jańa tarıfter engiziledi.
2025 jylǵy qyrkúıekke deıin halyq úshin sý tarıfi áleýmettik tarıf sheńberinde 1 m³ úshin 102,49 teńge bolǵan, al belgilengen normatıvten asyp ketken jaǵdaıda tarıf 204,99 teńgege deıin jetti. 1000 lıtr sýdyń ortasha baǵasy 150 teńge boldy. Keıin Almatyda moratorıı aıasynda tarıf 1 m³ úshin 76,56 teńgege deıin tómendetildi. Bul tómendetilgen tarıf bir jyldan astam ýaqyt qoldanysta boldy.
- Tómendetilgen tarıf qoldanylǵan kezeńde elektr energııasyna, materıaldarǵa, reagentterge, jabdyqtarǵa, jóndeý jáne tehnıkalyq qyzmet kórsetýge jumsalatyn shyǵyndar ósti. Sonymen qatar sońǵy bir jylda «Almaty Sý» teńgerimine jańa jeliler men nysandar berildi. Olardy paıdalaný da qosymsha qarjylandyrýdy talap etedi. Tarıf qurylymyna júıeniń táýlik boıy jumys isteýin jáne apattyq-qalpyna keltirý jumystaryn qamtamasyz etetin qyzmetkerlerdiń eńbekaqysyn ındeksteýge jumsalatyn shyǵyndar da engizildi, - dep túsindirdi «Almaty Sý» kásipornynyń qarjy jónindegi bas dırektorynyń orynbasary Jandos Tákibaev.
Ol sýmen jabdyqtaý jáne sý burý qyzmetteriniń quny kommýnaldyq tólem túbirtegindegi jalpy somanyń nebári 3–4 paıyzy bolatynyn atap ótti. Onyń aıtýynsha, esepteý aspaby ornatylǵan páter úshin sýyq sý men káriz qyzmetterine aı saıynǵy ortasha tólem shamamen 1500 teńgeni quraıdy.
Eske salaıyq, buǵan deıin Almatyda 1 qazannan bastap sý tarıfteri ózgeretinin jazǵanbyz.
