Almatyda sý qubyryn tartqan merdiger kompanııa qazylǵan jerdi tastap ketken
ALMATY. KAZINFORM – Qala qurylysyn baqylaý basqarmasy Rahat-Mádenıet shaǵyn aýdanynda «Sapa qurylys 2007» JShS merdiger uıymy júrgizip jatqan sý qubyry men káriz jelileriniń qurylysyna ınspektsııalyq tekserý júrgizdi.
– Tekserý barysynda birqatar zańbuzýshylyq anyqtaldy. Atap aıtqanda, keıbir ýchaskelerde qaıtadan topyraq toltyrylmaǵan, al keı jerde qabattap tyǵyzdaý jumystary júrgizilmegen. Bul jol jabyndysynyń shógýi men opyrylýyna alyp keldi. Sondaı-aq qorǵanys qorshaýlary, tireýler, or transheıalarynyń eńisterin óńdeý jumystary atqarylmaǵany anyqtaldy. Buǵan qosa, jobadan aýytqýshylyqtar da tirkeldi, – dep habarlady ákimdikten.
Basqarmadan atap ótkendeı, qazir QR ÁQBtK sáıkes birneshe bap boıynsha ákimshilik shara qabyldaý úshin jospardan tys tekseris bastaldy.
Osyǵan deıin Almatyda jobadan aýytqyǵan qurylys nysany týraly jazǵan edik.
Esterińizge sala keteıik, osy jyly Almatyda qurylys-montajdaý jumystarynyń tirek jáne (nemese) qorshaý konstrýktsııalaryn turǵyzýǵa jáne rekonstrýktsııalaýǵa qoıylatyn talaptarǵa sáıkestigin ınspektsııalaý úshin qurylys obektilerine barý tártibi kúshine endi.