Almatyda sý qaýipsizdigi erejelerin buzǵan 23 adamǵa jarty mıllıon aıyppul salyndy
ALMATY. KAZINFORM – 2024 jylǵy shomylý maýsymy bastalǵaly elimizdiń sý aıdyndarynda 100-den astam adam sýǵa batty, onyń 35-i bala. Bul týraly Almaty qalasynyń óńirlik kommýnıkatsııalar qyzmetiniń brıfınginde Almaty qalasy TJD azamattyq qorǵanys basqarmasynyń aǵa ofıtseri, kapıtan Esbol Sultanov málimdedi.
«2024 jylǵy shomylý maýsymy kezeńinde Almaty qalasynyń sý aıdyndarynda tótenshe jaǵdaılar tirkelgen joq. Almatyda jáne taý bókterindegi aýdandarda barlyǵy 44 sý aıdyny (toǵandar, kólder, ózender) bar. Sý aıdyndarynyń qaýipti ýchaskelerinde 83 «shomylýǵa tyıym salynady» degen belgi jáne 7 aqparattyq stend ornatyldy», – dedi Esbol Sultanov.
Sondaı-aq ol 2024 jylǵy shomylý maýsymynda qaýipsizdikti qamtamasyz etý maqsatynda departament memlekettik organdarmen jáne uıymdarmen birlesip qandaı jumys júrgizip jatqanyn aıtty.
«680-den astam birlesken reıd júrgizildi, onyń sheńberinde sý aıdyndaryndaǵy qaýipsizdik erejelerin buzǵany úshin QR ÁQBtK-niń 412-baby boıynsha jalpy somasy 595 myń teńgege 23 adam ákimshilik jaýapkershilikke tartyldy, 364-bap boıynsha jalpy sý paıdalaný erejelerin buzǵany úshin 6 adamǵa eskertý berildi, 440-bap boıynsha alkogoldik ishimdikterdi ishkeni úshin QR ÁQBtK-niń 412-baby boıynsha 6 adam ákimshilik jaýapkershilikke tartyldy, somasy 110 760 teńge», - dedi ol.
Eske salaıyq, Almaty taýlarynda sel qaýpiniń «qyzǵylt sary» deńgeıi jarııalandy.
