Almatyda stýdentterge arnalǵan qansha jataqhana bar
ALMATY. KAZINFORM – Almatyda ornalasqan 35 joǵary oqý ornynda 221 myń stýdent bilim alyp jatyr.
Qalalyq jastar saıasaty basqarmasynyń málimetinshe, olardyń 149 myńy Qazaqstannyń basqa óńirlerinen kelgen, al 17 myńy – sheteldik stýdentter. Qazir qalada jatyn oryn qajet etetin stýdentterge arnalǵan 136 jataqhana jumys isteıdi. Onyń 93-i oqý oryndarynyń qaramaǵynda bolsa, 43-i jekemenshikke tıesili. Odan bólek stýdentterdi ornalastyrý úshin 60 hostel de paıdalanylyp jatyr.
- Qazirgi kezde Almatydaǵy birneshe jekemenshik jataqhanada stýdentterdi ornalastyrýǵa múmkindik bar. Jalpy sany 830 bos oryn usynylyp otyr. Jataqhanaǵa ornalasý máseleleri boıynsha +7 705 191 34 19 telefony arqyly keńes alýǵa bolady, - dep habarlady basqarmadan.
Vedomstvo ókilderi jastardy jataqhanamen qamtamasyz etý maqsatynda qalada jańa nysandar ashylyp jatqanyn atap ótti. Máselen, 2023–2025 jyldary jalpy 12 773 orynǵa arnalǵan 43 nysan paıdalanýǵa berilgen. Al 2026 jyly taǵy 13 nysandy iske qosý josparlanyp otyr. Olar 3 775 orynǵa shaqtalǵan.
- 2026 jyldyń qorytyndysy boıynsha Almatydaǵy stýdentterge arnalǵan turǵyn úı qorynyń jalpy syıymdylyǵy shamamen 50 myń orynǵa jetedi dep boljanyp otyr, - dep habarlady basqarmadan.
Eske salaıyq, Qazaqstan 2029 jylǵa qaraı 100 myń sheteldik stýdentti qabyldaýy múmkin.
