Almatyda stýdentterdi jataqhanamen qamtamasyz etý úshin Ahýaldyq ortalyq ashyldy
ALMATY. KAZINFORM – Ǵylym jáne joǵary bilim mınıstrligi men Almaty qalasy ákimdiginiń bastamasymen stýdentterdi jataqhanamen qamtamasyz etý maqsatynda Qazaq ulttyq qyzdar pedagogıkalyq ýnıversıtetiniń bazasynda Ahýaldyq ortalyq ashyldy.
Atalǵan ortalyq Almaty qalasy, Bógenbaı batyr kóshesi 142 mekenjaıynda ornalasqan ýnıversıtet ǵımaratynyń aýmaǵynda ornalasqan. Ǵylym jáne joǵary bilim mınıstri Saıasat Nurbek atalǵan ortalyq jataqhanadan oryn taba almaǵan stýdentterge kómek kórsetetinin aıtty.
- Ár joǵary oqý ornynyń janynan arnaıy tsıfrlyq platforma quryldy. Ol otandyq joǵary oqý oryndarynyń 80%-nda bar. Aıta keteıik, Narhoz jáne Satbayev University-de stýdent jataqhanadan bólmeni, oryndy ózi tańdaıdy. Al jataqhanadan oryn ala almaǵan stýdentter Qazaq ulttyq qyzdar pedagogıkalyq ýnıversıtetiniń bazasynda ashylǵan Ahýaldyq ortalyqtyń kómegine júgine alady. Sondaı-aq Almatyda bos oryn taba almaı qıyn jaǵdaıǵa tap bolǵan stýdentterge ýnıversıtettermen birlese tótenshe jaǵdaıǵa arnalǵan 55 arnaıy bólme daıyndadyq, – dedi mınıstr.
Ortalyqta 10 tolyqqandy jumys orny bar. Arnaıy jumys orny zamanaýı kompıýterlermen, baılanys quraldarymen, tsıfrlyq derekqorlarǵa qoljetimdilikpen jáne joǵary oqý oryndarymen jedel baılanys arnalaryna (bir nómirge bir ýaqytta qosylatyn 10 baılanys jelisi) qosylǵan júıemen jabdyqtalǵan. Sonymen qatar ortalyqta jınalystar men brıfıngter ótkizýge arnalǵan konferents-zal, kelýshilerge arnalǵan kútý jáne demalys aımaǵy men oqý buryshy qarastyrylǵan.
Mınıstrdiń aıtýy boıynsha, jataqhana máselesin sheshý úshin elimizde arnaıy normatıvtik sýbsıdııalar ulǵaıtyldy, jekemenshik merdigerlerdi, kompanııalardy tartyp, 5 jyldyń ishinde 400-den astam jataqhana salyndy.
Sondaı jobalardyń biri retinde kásipker Baýyrjan Káribjanov Almatyda qalaǵa kelgen stýdentterdi ornalastyratyn jataqhana salyp, qoldanysqa berip jatyr.
- Bul jataqhana 4 qabattan turady. Ár qabatta 12 páter bar. Bir páterde eki jatyn bólme bar, ár bólmede 4 stýdent turady. Páterdiń ishinde barlyq jaǵdaı jasalǵan – zamanaýı ashana, tońazytqysh, kir jýatyn mashına, jýynatyn bólme men dárethana bar. Sonymen qatar ǵımarat órt qaýipsizdigi júıesimen jabdyqtalǵan, órt datchıkteri ornatylǵan. Qaýipsizdikke erekshe kóńil bóldik. Stýdentterdi jataqhanaǵa 1 qyrkúıekten bastap kelisimshart negizinde qabyldaı bastaımyz, – dedi ınvestor.
Osylaısha, Almatyda Sıtýatsııalyq ortalyqtyń iske qosylýy stýdentterdiń turmys jaǵdaıyn jaqsartý jáne bilim alýshy jastardy qoljetimdi turǵyn úımen qamtamasyz etý boıynsha keshendi jumystardyń taǵy bir qadamy boldy.
Aıta ketelik Shymkentte qaıtarylǵan aktıvter esebinen 300 oryndyq jataqhana salynyp jatyr.