Almatyda stýdentter arasyndaǵy shahmattan komandalyq álem chempıonaty bastaldy
ASTANA. KAZINFORM — Almatyda 4–9 tamyz aralyǵynda joǵary oqý oryndary arasyndaǵy shahmattan komandalyq álem chempıonaty ótedi. Týrnırde álemniń 16 jetekshi ýnıversıtetiniń, sonyń ishinde Oksford, Kembrıdj jáne Garvard ýnıversıtetteriniń komandalary baq synaıdy, dep jazdy. Kazinform tilshisi.
Qazaqstan atynan jarysqa Qazaq ulttyq sport ýnıversıteti, ál-Farabı atyndaǵy Qazaq ulttyq ýnıversıteti jáne Almaty Management University (AlmaU) komandalary qatysyp jatyr.
Qazaqstandyq komandalardyń sapyndaǵy eń joǵary reıtıngke ıe shahmatshylar qatarynda Qazaq ulttyq sport ýnıversıtetiniń ókilderi Qazybek Nógerbek (FIDE reıtıngi — 2495), Sátbek Ahmedınov pen Merýert Kamalıdenova (ekeýi de — 2400), sondaı-aq QazUÝ komandasynan FM Erlan Tileýhanov (2296) jáne AlmaU quramynan FM Jáńgir Bıjigitov (2272) bar.
1 tamyzdaǵy ortasha reıtıng boıynsha týrnırdiń favorıtteri qatarynda Saint Louis University (2577), Ural State Mining University (2514), University of Texas at Dallas (2441) jáne Qazaq ulttyq sport ýnıversıteti (2420) tur.
Premer-mınıstrdiń orynbasary — Mádenıet jáne aqparat mınıstri Aıda Balaeva chempıonattyń ashylýynda Qazaqstannyń álemniń úzdik jas shahmatshylaryn qabyldap otyrǵanyn atap ótti.
— Búginde Qazaqstan álemniń jetekshi oqý oryndarynyń úzdik jas shahmatshylaryn toǵystyrǵan alańǵa aınalyp otyr. Bul chempıonat — tek medal úshin tartys qana emes, ýnıversıtetter arasyndaǵy yntymaqtastyqty nyǵaıtyp, bilim almasýǵa jáne elder arasyndaǵy uzaqmerzimdi seriktestikti damytýǵa múmkindik beretin mańyzdy alań, — dedi mınıstr.
Ǵylym jáne joǵary bilim mınıstri Saıasat Nurbek shahmattyń bilim berý júıesindegi róline toqtaldy. Onyń aıtýynsha, búginde elimizdegi bes pedagogıkalyq joǵary oqý ornynda 200-den astam stýdent «Shahmat pedagogi» Minor baǵdarlamasy boıynsha bilim alǵan. Sonymen qatar 31 joǵary oqý ornynda shahmatqa qatysty pánder oqytylady.
— Shahmat — zııatkerlik oıyn ǵana emes, synı oılaý, jaýapkershilik, derbestik pen strategııalyq josparlaý qabiletin damytatyn tıimdi bilim berý quraly. Sondyqtan shahmatty oqý úderisine kásibı engize alatyn pedagogterdi daıarlaý — biz úshin mańyzdy mindet, — dedi mınıstr.
Qazaqstan shahmat federatsııasynyń prezıdenti Tımýr Týrlov mundaı iri týrnırdiń Almatyda ótýi elimizdiń álemdik shahmat qaýymdastyǵyndaǵy bedeliniń artqanyn kórsetetinin aıtty.
— Qazaqstan men Almatynyń osy tarıhı jarysty qabyldaýy — elimizdiń jáne ulttyq federatsııanyń álemdik shahmattaǵy ornynyń aıqyn dáleli. Biz úshin stýdenttik shahmatty damytý — basty basymdyqtardyń biri. Óıtkeni dál ýnıversıtet qabyrǵasynda bolashaqta ǵylym, bilim jáne halyqaralyq jobalarǵa ulasatyn baılanystar qalyptasady, — dedi Tımýr Týrlov.
Almaty ákiminiń orynbasary Nurlan Ábdirahym megapolıstiń stýdentter qalasy ekenin atap ótti. Onyń aıtýynsha, búginde Almatyda 236 myńnan astam stýdent bilim alady. Sondyqtan jastardy biriktiretin álem chempıonatynyń dál osy qalada ótýi zańdy.
Sonymen qatar 4–5 tamyz kúnderi Almatyda 8–18 jas aralyǵyndaǵy Qazaqstan quramasy men álem quramasy arasynda jasóspirimder matchy ótedi. Jarys uldar men qyzdar arasynda aldymen rapıd, keıin blıts formatynda uıymdastyrylady. Matchtyń jalpy júlde qory — 15 mıllıon teńge.
Buǵan deıin qazaqstandyq shahmatshy Alýa Nurman 20 jasqa deıingi qyzdar arasyndaǵy álemdik reıtıngte úshinshi orynǵa kóterilgeni habarlanǵan bolatyn.
