Almatyda stýdent qyzdyń qazasyna qatysty mınıstr pikir bildirdi
ASTANA. KAZINFORM — Ǵylym jáne joǵary bilim mınıstri Saıasat Nurbek Almatydaǵy ál-Farabı atyndaǵy QazUÝ stýdentiniń qaıtys bolýyna qatysty pikir bildirdi. Onyń aıtýynsha, ýnıversıtet basshylyǵy marqumnyń otbasyna qajetti kómek kórsetken.
– Biz birden qamqorshylarymen baılanysqa shyqtyq. Barlyq shyǵyndy ýnıversıtet óz moınyna aldy, tólemdi de qaıta qalpyna keltirdik. Ákesimen jáne qamqorshylarymen tikeleı baılanystamyz, qajetti kómektiń barlyǵyn kórsetýge daıynbyz. Bizdiń tarapymyzdan jasalýy tıis barlyq áreket oryndaldy, – dedi mınıstr Quryltaıda ótken brıfıngide.
Sondaı-aq ol jýrnalısterdi oqıǵanyń mán-jaıyn jarııalaý kezinde saq bolýǵa shaqyrdy. Sebebi qazirgi ýaqytta tergeý amaldary jalǵasyp jatyr.
– Sotqa deıin tergeý organdarynyń barlyq áreketi jarııa etilmeýi kerek. Biz de buǵan qatysty jýrnalısterden túsinistik tanytýdy suraımyz. Bul oqıǵa keńinen talqylanyp jatyr, alaıda tergeý áli jalǵasyp jatyr. Biz tipti resmı túrde eshqandaı túsinikteme bergen joqpyz. Óıtkeni Almaty qalasynyń Polıtsııa departamenti ýnıversıtetke protsestik áreketter júrip jatqan kezeńde aqparat jarııalaýǵa qatysty qatań eskertý jasady. Sondyqtan jarııalanymdarda muqııat bolýyńyzdy suraımyz, – dedi Saıasat Nurbek.
Aıta keteıik, buǵan deıin Almatyda QazUÝ stýdentiniń ólimine qatysty qylmystyq is qozǵalǵanyn jazǵanbyz.
