Almatyda sporttyq ınfraqurylym keńeıtilip, buqaralyq sport keń qoldaý taýyp otyr
ALMATY. KAZINFORM – Almatyda sporttyq ınfraqurylymdy damytý jáne buqaralyq sportty nasıhattaý boıynsha aýqymdy jobalar júzege asyrylyp jatyr. Bul týraly qalalyq Sport basqarmasynyń ókilderi habarlady.
2024-2025 jyldary megapolıste 6 jańa deneshynyqtyrý-saýyqtyrý kesheni paıdalanýǵa berildi, sondaı-aq 2 sport nysany jeke ınvestıtsııa esebinen salyndy.
Alataý aýdanyndaǵy Nurkent shaǵynaýdanynda jeke ınvestıtsııa esebinen jańa tennıs ortalyǵy ashyldy. Keshenniń quramyna HARD jabyndy 4 jabyq jáne 4 ashyq kort, sondaı-aq 6 topyraqty kort kiredi.
Ulttyq sport túrlerin damytý maqsatynda «Tulpar» kesheni kommýnaldyq menshikke qaıtarylyp, Sport basqarmasynyń jedel basqarmasyna berildi. Onyń aýmaǵynda 100 atqa arnalǵan tórt at qora, sport zaldary jáne eki ashyq manej bar.
Raıymbek dańǵylynda erekshe qajettiligi bar adamdarǵa arnalǵan sport ortalyǵynyń qurylysy bastaldy. Qurylysty aıaqtaý 2026 jyldyń IV toqsanyna josparlanǵan. Ortalyq Almatyda múmkindigi shekteýli sportshylardy daıarlaýǵa arnalǵan alǵashqy mamandandyrylǵan nysan bolmaq.
2027 jyldyń sońyna deıin Naýryzbaı, Alataý jáne Túrksib aýdandarynda alty denenshynyqtyrý- saýyqtyrý, sondaı-aq úsh sport mektebin salý josparlanyp otyr. «Avıator», «Shuǵyla», № 9 sport mektebi jáne daryndy balalarǵa arnalǵan mektep-ınternat jobalary memlekettik saraptamanyń oń qorytyndy aldy.
Sporttyq mańyzy bar iri jobalardy júzege asyrý jalǵasyn taýyp otyr. Almatynyń jańa fýtbol stadıonyn salý boıynsha daıyndyq jumystary bastalyp ketti. Kórkem gımnastıka ortalyǵynyń jobasy ázirlenip, «Medeý» bıik taýly sport keshenin qaıta qurý aıasynda jańartý jumystary júrgizilip jatyr.
Nurkent shaǵynaýdanynda júzý basseıni bar 5 myń oryndyq ámbebap arena salý josparlanǵan.
Almatyda jyl saıyn 310 myńnan astam sportshy qatysatyn 3 myńnan astam sporttyq-buqaralyq is-shara ótkiziledi. Olardyń qatarynda Almaty Marathon, ATP-250 Almaty Open, WTT Contender, Uly dala oıyndary, dzıýdodan Azııa kýbogy, sondaı-aq mánerlep syrǵanaýdan 18 elden kelgen sportshy qatysatyn Denis Ten Memorial Challenge halyqaralyq týrnıri bar.
Almatydaǵy Gorky Tennis Park álemdegi eń aıtýly tennıs týrnırleriniń biri Roland — Garros resmı klýby mártebesine ıe boldy.
2025 jyldan bastap qalada 35 JOO, 108 komanda jáne 1500 stýdentti biriktiretin stýdentter lıgasy bastaldy. Balalardyń fýtbol lıgasy jobasy iske asyrylyp jatyr, oǵan 8 myńnan astam bala qatysyp jatyr.
Jaqynda Almatyda ótken «Jiger» festıvali erekshe qajettiligi bar 1 myńnan astam qatysýshynyń basyn qosty.
Qysqy kezeńde konkımen syrǵanaý jobasy dástúrli túrde jalǵasyp keledi. Bıyl qalanyń tanymal qoǵamdyq alańdarynda 16 muz aıdynyn jasaý josparlanyp otyr. Kelesi jyly konkımen adaptıvti syrǵanaý uıymdastyrylady.
2026 jyldan bastap buqaralyq sportty damytýǵa jáne belsendi ómir salty mádenıetin qalyptastyrýǵa baǵyttalǵan Active city Hub jańa qalalyq jobasy qolǵa alynady. Joba boıynsha apta saıynǵy sporttyq is-sharalarǵa, ashyq jattyǵýlarǵa, Run & Clean, Free Zone jáne Kids Lab bastamalaryna jylyna 50 myń adam tartý qarastyrylǵan.
Bıyl jyl sońyna qaraı Almatyda fýtzaldan ÝEFA Chempıondar Lıgasyn, sondaı-aq kúres túrleri boıynsha Qazaqstan Respýblıkasynyń chempıonatyn jáne jasóspirimder arasynda bokstan el birinshiligin ótkizý kózdelip otyr.
— Atalǵan jobalardy júzege asyrý Almatynyń Ortalyq Azııanyń sporttyq astanasy retindegi mártebesin nyǵaıtýǵa, buqaralyq sportty damytýǵa jáne qalanyń halyqaralyq ımıdjin arttyrýǵa yqpal etedi, — dedi Almaty qalasy Sport basqarmasynyń ókilderi.