Almatyda sport mektebindegi órtten karaoke ǵımaraty da zardap shekti

ALMATY.KAZINFORM - 15 qarashada Almatydaǵy №2 mamandandyrylǵan balalar men jasóspirimder olımpıadalyq rezerv sport mektebiniń sport zalynda bolǵan órt kórshiles ornalasqan karaoke ǵımaratyna da tarady. Órt saldarynan oıyn-saýyq orny qatty zaqymdandy.

Pojar v SDıÝShOR Almaty ýnıchtojıl sosednee karaoke: vladeltsy obratılıs za pomoşıý
Foto: Kazinform/JI

Qalalyq Tótenshe jaǵdaılar departamentiniń málimetinshe, órt týraly habarlama 15 qarasha kúni saǵat 08:44-te túsken. Órt Almaly aýdanyndaǵy Brýsılovskıı kóshesi, 134a mekenjaıynda bolǵan.

Oqıǵa ornyna jetken órt sóndirýshiler jalynnyń №2 mamandandyrylǵan balalar men jasóspirimder olımpıadalyq rezerv sport mektebiniń jeńil atletıka manejin sharpyǵanyn jáne kórshiles karaoke ǵımaratyna taralǵanyn anyqtady. Órttiń jalpy aýmaǵy - 1500 sharshy metr. Órt saǵat 09:37-de oqshaýlanyp, 10:18-de tolyq sóndirildi. Zardap shekkender joq.

Órt sóndirýshilerdiń jedel áreketiniń arqasynda jalynnyń balalar men jasóspirimder fýtbol ortalyǵynyń sport nysanyna jáne jaqyn mańdaǵy «Qaıǵyǵa ortaqtasýshy» Qudaı anasynyń ıkonasy atyndaǵy pravoslav shirkeýine taralýyna jol berilmedi.

Karaoke ǵımaraty qatty zaqymdanǵan

Oqıǵadan keıin karaoke ıeleri áleýmettik jeli arqyly Almaty turǵyndaryna úndeý jasady. Olardyń aıtýynsha, órt saldarynan ǵımarattyń basym bóligi jaramsyz kúıde.

— Ókinishke qaraı, ózimizge qatysy joq órt saldarynan ǵımaratymyz qatty zardap shekti. Jalyn biz úshin qymbat bolǵan dúnıelerdiń barlyǵyn derlik joıdy. Shatyr, karaokeniń ortaq zaly, kabınalar men óndiristik bólmeler tolyǵymen órtendi. Basqa kabınalarda sylaq opyrylyp tústi, — deıdi karaoke ıeleri.

Olardyń sózinshe, ǵımaratty qalpyna keltirý úshin aýqymdy jóndeý jumystary qajet. Osyǵan baılanysty kásip ıeleri qarajat jınaýdy bastap, qala turǵyndarynan kómek surady.

Eske salaıyq, 15 qarasha kúni tańerteń Almatydaǵy eń kóne sporttyq oqý oryndarynyń biri — №2 mamandandyrylǵan balalar men jasóspirimder olımpıadalyq rezerv sport mektebinde (SDıÝShOR №2) iri órt shyqty.

Keıin órtengen jeńil atletıka maneji burynǵy ornynda qaıta salynatyny belgili boldy. Qalpyna keltirý jumystary kezinde 352 sportshynyń jattyǵýy basqa sport nysandarynda uıymdastyrylady.