Almatyda «Sport – Dostyq alańy» qalalyq sporttyq jobasy júzege asyrylyp jatyr
ASTANA. KAZINFORM - Táýelsizdik kúni qarsańynda Almatyda buqaralyq sportty damytýǵa, aýla bastamalaryn qoldaýǵa, ár jastaǵy turǵyndardy belsendi ómir saltyna tartýǵa, sondaı-aq qalanyń ár aýdanynda biryńǵaı dostyq sport ortasyn qalyptastyrýǵa baǵyttalǵan «Sport – Dostyq alańy» qalalyq sporttyq jobasy júzege asyrylyp jatyr.
Joba túrli alańdardy qamtyp, fleshmobtar, týrnırler, otbasy jarystary men áleýmettik-sporttyq aktsııalardy biriktiredi.
Ótken demalys kúnderi Almatynyń birneshe aýdanynda aýqymdy is-sharalar ótti.
Medeý aýdanynda joba aıasynda jáne «Taza Qazaqstan» respýblıkalyq aktsııasymen birlese iri sporttyq eko-fleshmob uıymdastyryldy. 700-den astam turǵyn — jastar, oqýshylar, stýdentter, aýdan ardagerleri men volonterler — sporttyq oıyndar, bı fleshmobtary jáne túrli belsendi baǵdarlamalarǵa qatysty.
Almaly aýdanyndaǵy Gandı atyndaǵy saıabaqta sporttyq otbasylyq estafeta ótti. Týrnırge ata-analar men olardyń balalary qatysyp, uıymshyldyqty, energııany jáne naǵyz komanda rýhyn kórsetti. Estafetalar jarqyn, shıelenisti jáne kóńildi ótti. Birinshi oryndy Asqarovtar otbasy ıelendi. Barlyq qatysýshylarǵa alǵys hattar men estelik syılyqtar tabystaldy.
Áýezov aýdanynda aýqymdy spartakıada uıymdastyryldy. Qatysýshylar asyq atý, darts, shahmat, arqan tartý jáne tartysty voleıbol matchtary sııaqty birneshe sport túrlerinen kúsh synasty.
Alataý aýdanynyń Nurkent yqshamaýdanynda «Sport – Dostyq alańy» jobasy aıasynda ashyq fýtbol jattyǵýy ótti. Іs-sharada kásibı jattyqtyrýshylar balalar úshin belsendi, serpindi jáne shabyttandyratyn atmosfera qalyptastyrdy. Jastar belsendi qatysyp, fleshmob oryndap, oıynnyń negizgi elementterin pysyqtap, komandalyq tapsyrmalarǵa qatysty.
Bostandyq aýdanynda Birinshi Prezıdent saıabaǵynda joba aıasynda ulttyq sport túrlerinen jarystar ótti. Jastar arqan tartý, láńgi, asyq atý, armrestlıng jáne qoı kóterý boıynsha qyzyǵýshylyqpen baq synady.
Túrksib aýdanynda balalar men jastar jekpe-jek túrleri boıynsha jarysyp, týrnıkke tartylyp, qoldy jerge tirep jattyǵý jasady.
Jobaǵa turǵyndar rızashylyq bildirip, endi ol aldaǵy demalys kúnderi de jalǵasyn tabady.
6 jeltoqsanda Gandı atyndaǵy saıabaq pen Naýryzbaı aýdany amfıteatrynda túrli estafetalar, jonglerlik jáne dop laqtyrý saıystary ótedi. Al Aınabulaq-2 yqshamaýdanyndaǵy Arbatta basketbol jáne armrestlıng boıynsha jarystar uıymdastyrylady.
7 jeltoqsanda Aıteke bı kóshesindegi skverde park boıynsha júgirý, qyzdyrý jattyǵýlary jáne «Maýsymaralyq kezeńde qalaı jattyqqan durys?» taqyrybynda dáris ótkiziledi. Jas Qanat yqshamaýdanynda dzıýdo boıynsha kórsetilimder, jattyǵýlar, armrestlıng, arqan tartý, shahmat týrnıri, uzyndyqqa sekirý, shyǵarmashylyq qoıylymdar uıymdastyrylady.
«Sport – Dostyq alańy» jobasy aýdandardy biriktirip, sport mádenıetin nyǵaıtýǵa yqpal etetinin atap ótken jón. Jobanyń ortaq ıdeıasy arqyly qalanyń ár aýdanyndaǵy turǵyndar sport tóńireginde birigip, belsendi ýaqyt ótkizýge, tájirıbe almasýǵa jáne dene daıyndyǵyn jetildirýge múmkindik alady.
Joba jastar arasynda senimdilik, shydamdylyq, dástúrge qurmet jáne salaýatty ómir saltyna berilgendik qasıetterin qalyptastyrýǵa da yqpal etedi.
Almaty «Sport – Dostyq alańy» jobasyn odan ári jalǵastyryp, buqaralyq sportty damytý jáne qala turǵyndary úshin belsendi ári salaýatty ómir saltyna jaǵdaı jasaý sharalaryn jalǵastyrady. Alda — jańa týrnırler, fleshmobtar, jarystar jáne qalanyń biryńǵaı sport mádenıetiniń bir bóligine aınalatyn áleýmettik bastamalar tur.
