Almatyda sotqa túsetin azamattyq isterdiń sany eki ese ósken

ALMATY. KAZINFORM – Óńirlik kommýnıkatsııalar qyzmetiniń alańynda Almaty qalasy Medeý aýdandyq sotynyń sýdıasy Dınara Kýıkabaeva Medeý aýdandyq sotynyń 2024 jyldyń birinshi toqsanyndaǵy jumysyn qorytyndylady.

Almaty qalasy Medeý aýdandyq sotynyń sýdıasy Dınara Kýıkabaeva kelisimshart boıynsha bereshekti óndirip alý máselesine baılanysty eń kóp shaǵym túsetinin aıtty. Onyń aıtýynsha, Medeý aýdandyq soty azamattyq isterdi qaraýǵa mamandanǵan.

«2024 jyldyń 1 toqsanynda sotqa 9 545 azamattyq is kelip tústi, al ótken jyly osy kezeńde 7 480 is boldy, ıaǵnı olardyń sany 2 myńǵa ósti. Talaptardyń basym kópshiligi - sharttyq quqyqtyq qatynastardan týyndaıtyn daýlar. Bul sharttardy buzý, olardy jaramsyz dep taný, sharttar boıynsha, onyń ishinde bankter men kollektorlyq uıymdardyń talap-aryzdary boıynsha bereshekti óndirip alý týraly máseleler», - dedi sýdıa.

Sondaı-aq Dınara Kýıkabaeva daýlardy sotqa deıingi sheshý ádisteriniń biri medıatsııa ekenin atap ótti. Bul ádistiń máni - eki tarap úshin de ózara tıimdi sharttarda istiń nátıjesine múddeli emes táýelsiz medıatorlardyń daýlardy sheshýi. Ótken jyly Medeý aýdandyq sotynda tatýlastyrý rásimderi arqyly 4 382 is aıaqtalǵan.

«Bul kórsetkish sottyń tatýlasý kórsetkishteri 6 eseden astam óskenin kórsetedi. Onyń artynda tatýlastyrýshy sýdıalardyń orasan zor eńbegi tur», - dedi Dınara Kýıkabaeva.

Bıyl jyl basynan beri medıatsııa tártibimen daýdy retteý týraly 117 bitimgershilik kelisim jáne 1202 kelisim bekitildi. ıAǵnı, tatýlasý jolymen ótken jylmen salystyrǵanda eki eseden astam is aıaqtaldy.