Almatyda sotqa qatysty aqparatty endi Telegram-bot arqyly alýǵa bolady
ASTANA. KAZINFORM — Almaty qalalyq soty turǵyndarmen keri baılanysty kúsheıtý jáne azamattardyń ótinishterin jedel qaraý maqsatynda jańa tsıfrlyq servıs — «Almatysot» Telegram-botyn iske qosty.
Joba Almaty qalalyq soty tóraǵasynyń tapsyrmasymen Sot ákimshiliginiń Almaty qalasy boıynsha departamenti tarapynan júzege asyrylǵan.
Jańa servıs arqyly azamattar sot jumysyna qatysty suraqtaryn yńǵaıly formatta joldap, qajetti aqparatty jedel ala alady. Telegram-bottyń basty maqsaty — sot júıesiniń qoljetimdiligin arttyryp, turǵyndarmen tıimdi kommýnıkatsııa ornatý.
Bot myna silteme arqyly qoljetimdi: @ALMATYSOT_bot
— Almaty sottaryna kún saıyn azamattardan, advokattardan jáne sot protsesine qatysýshylardan kóptegen ótinish túsedi. Olardyń basym bóligi uıymdastyrýshylyq jáne aqparattyq sıpattaǵy máseleler bolǵandyqtan, jańa servıs mundaı suraqtardy qysqa merzimde sheshýge múmkindik beredi, — delingen sot taratqan aqparatta.
Telegram-bot ótinishti avtomatty túrde qabyldap, qajetti málimetterdi kezeń-kezeńimen suratady. Atap aıtqanda:
— ótinish berýshiniń aty-jóni;
— sot isiniń nómiri;
— protsess qatysýshysynyń mártebesi;
— sottyń ataýy;
— ótinishtiń mazmuny.
Osy málimetter engizilgennen keıin júıe qurylymdalǵan ótinishti avtomatty túrde tıisti sottyń jaýapty qyzmetkerlerine joldaıdy.
Sot ókilderiniń aıtýynsha, jańa servıs:
— keri baılanystyń sapasyn arttyrýǵa;
— ótinishterdi qaraý merzimin qysqartýǵa;
— sheshilmegen máseleler sanyn azaıtýǵa;
— shaǵymdar kólemin tómendetýge;
— ýaqytyly kommýnıkatsııa bolmaýynan týyndaıtyn daýly jaǵdaılardyń aldyn alýǵa múmkindik beredi.
Sonymen qatar, Telegram-bot sottar men protseske qatysýshylar arasyndaǵy ózara is-qımyldy tıimdi etip, ishki jumys protsesterin ońtaılandyrýǵa kómektesedi.
Aıta keteıik, «Almatysot» Telegram-boty sotqa resmı túrde júginý arnalarynyń ornyn almastyrmaıdy jáne protsessýaldyq qujattardy qabyldaýǵa arnalmaǵan. Servıs azamattarǵa jedel aqparat berý jáne baılanys ornatý úshin iske qosylǵan.
Telegram-bot jumys kúnderi jumys ýaqytynda qyzmet kórsetedi.
Osydan buryn kóshede aıaǵyn syndyrǵan Petropavl turǵyny sot arqyly ákimdikten ótemaqy alǵanyn jazǵan edik.
