Almatyda SOS batyrmasy bar alǵashqy telemedıtsınalyq modýl iske qosyldy
ALMATY. KAZINFORM – Almatyda jaqynda ashylǵan Flow park saıabaǵynda táýlik boıy jumys isteıtin modýldik alǵashqy medıtsınalyq kómek kórsetý pýnkti ornatyldy.
Almaty qalasynyń tsıfrlandyrý basqarmasynyń málimetinshe, ózin jaısyz sezingen nemese jaraqat alǵan jaǵdaıda turǵyn SOS batyrmasyn basyp, jedel medıtsınalyq járdem dıspetcherimen birden baılanysa alady. Medıtsına qyzmetkeri modýldi qashyqtan ashyp, aýdıo jáne beınebaılanys arqyly adamnyń jaǵdaıyn baǵalaıdy ári jedel járdem brıgadasy kelgenge deıin qajetti nusqaý beredi.
Ólshemi 2×2,5 metr bolatyn pýnkttiń ishinde defıbrıllıator, jaraqattardy alǵashqy óńdeýge arnalǵan quraldar, jedel koronarlyq sındrom kezinde kómek kórsetýge arnalǵan medıtsınalyq jıyntyq, brezent kórpe jáne tot baspaıtyn bolattan jasalǵan medıtsınalyq kýshetka ornalastyrylǵan.
Sondaı-aq nysan úzdiksiz ınternetpen, 360 gradýs sholý múmkindigi bar syrtqy beınebaqylaý kamerasymen, ishki kameralarmen, aqparattyq dıspleımen jáne qashyqtan basqarylatyn telemedıtsınalyq keshenmen jabdyqtalǵan.
- Dıspetcher naqty ýaqyt rejıminde jabdyqtar men alǵashqy kómek kórsetý quraldaryn paıdalaný tártibin túsindirip otyra alady. Modýldiń qurylymy túrli aýa raıy jaǵdaıyna tózimdiligi joǵary HPL-panelder men tot baspaıtyn bolattan jasalǵan, - dep habarlady ákimdikten.
Eske salaıyq, júktilikke baılanysty áleýmettik tólemdi rásimdeýde qandaı qatelikter jıi kezdesetinin jazǵanbyz.
