Almatyda sońǵy eki jylda 1 mln-nan astam aǵash otyrǵyzyldy
ALMATY. KAZINFORM – Bıyl megapolıste 290 shaqyrym jergilikti sýarý júıesi salynady. Bul aǵashtardy, butalardy jáne gúlderdi sýarý sapasyn jaqsartady.
Almaty ákimdiginen málim etkendeı, qalalyq ortany kógaldandyrý boıynsha aýqymdy baǵdarlama iske asyp jatyr. Jyl basynan beri megapolıste bıiktigi 6 metrden asatyn 2myń iri aǵash otyrǵyzyldy, onyń ishinde eren, jóke, kúmis úıeńki, qaraǵash, qaraǵaı, kók jáne jasyl shyrshalar bar.
Sondaı-aq, bıiktigi 2,5 metr 20 myńǵa jýyq kóshet jáne 10 myńnan astam buta otyrǵyzyldy. Kúzde bıiktigi 4-ten 6 metrge deıin taǵy 4 myń iri aǵash otyrǵyzý josparda.
– Sońǵy eki jylda Almatyda 1 mln-nan astam aǵash pen buta otyrǵyzyldy. Jasyl keńistikterge kútim jasaýdyń jańartylǵan tásilderiniń nátıjesinde kóshetterdiń ómir súrý deńgeıi 70 paıyzdan 90 paıyzǵa deıin artty.Turaqty kógaldandyrý úlgisine kóshý aıasynda kópjyldyq ósimdikterdiń úlesi artyp keledi. 2025 jyly qalada120 myń sharshy metrden astam jerge gúl ósiriledi. Onyń 64 paıyzy kópjyldyq, – dep habarlady ákimdikten.
Budan bólek, sýarýdy qamtamasyz etýge basymdyq beriledi. Eki jyl ishinde qalada 500 shaqyrym avtosýarý jáne tamshylatyp sýarý jelileri salyndy, 2025 jyly taǵy 290 shaqyrym salý kózdelgen. Bul 1 mıllıonǵa deıin aǵashty sýarýǵa múmkindik beredi.
– Іri aǵashtardy tańdaý, avtosýarýdy engizý jáne kópjyldyqtardyń úlesin arttyrý — bul zamanaýı jáne ǵylymı negizdelgen sheshimder. Kóshetterdiń túsýin 10 paıyzǵa deıin tómendetý qabyldanǵan sharalardyń tıimdiliginiń aıqyn dáleli, – dep atap ótti Jazken Jıembaev atyndaǵy karantın jáne ósimdikterdi qorǵaý ınstıtýtynyń bólim basshysy Nurjan Muhamadıev.
Osyǵan deıin Almatyny gúlmen kómkerýge 2,6 mlrd teńge bólingeni týraly jazǵanbyz.