Almatyda soǵys ardagerlerine arnalǵan 8 alleıa ashyldy
ALMATY. KAZINFROM — Almatyda Jeńistiń 80 jyldyǵyna arnalǵan ekologııalyq aktsııa aıasynda barlyq segiz aýdanda soǵysy ardagerleriniń alleıasy ashyldy. Bul ekoaktsııa «Taza Qazaqstan» respýblıkalyq baǵdarlamasy men «Almaty — bizdiń ortaq úıimiz» jalpyqalalyq naýqan aıasynda uıymdastyryldy.
28 gvardııashy-panfılovshylar saıabaǵynda Ekinshi dúnıejúzilik soǵysy ardagerleriniń Alleıasy ashyldy.
Sharaǵa shahar basshysy Erbolat Dosaev, soǵys ardagerleri, olardyń otbasy músheleri, Qazaqstannyń eńbek sińirgen artısteri jáne qoǵam ókilderi qatysty.
— Qalanyń barlyq aýdanynda bir mezette ardagerler alleıasy ashyldy. Bul jerlerdi ár aýdan turǵyny bilip, baryp, batyrlarymyzdyń rýhyna taǵzym etkenin qalaımyn. Almatyda búginde 21 soǵys ardageri turady — bul respýblıka boıynsha eń úlken kórsetkish. Biz sońǵy eki jylda ómirden ozǵan ardagerlerdi de qurmetpen eske alamyz. Barlyǵy 29 aǵash egildi. Bul alleıalar bolashaq urpaq — balalar, nemere-shóbereler úshin batyrlyqty eske salyp turatyn tiri eskertkishke aınalady, — dedi Erbolat Dosaev.
Ardagerlerdiń týystarymen birge Almaty ákimi bıiktigi 6 metr bolatyn jóke aǵashy otyrǵyzyldy. Ár aǵashtyń janyna ardagerdiń aty jazylǵan arnaıy taqtaısha ornatyldy.
Aǵash otyrǵyzý kezinde zamanaýı ádister men tehnologııalar qoldanyldy: aǵashty tik ustaýǵa arnalǵan qaıyń tirekter, sondaı-aq, tamyr arqyly sýarý júıesi ornatyldy.
— Soǵys ardagerleriniń barlyq urpaǵy atynan atalarymyzdyń, ákelerimizdiń, analarymyz ben ájelerimizdiń jarqyn beınesin eske alyp, qurmet kórsetkenderińiz úshin alǵys aıtamyn. Jóke — erekshe aǵash. Ol rýhtyń myqtylyǵyn, tózimdilik pen adaldyqty bildiredi. Bul kóne ári asyl sımvol bizge bolashaq urpaq úshin ómirin sarp etken jandardy árdaıym eske salyp turady. Hosh ıisti gúli men uzaq jasaıtyn qasıeti bar jóke — batyrlarymyzdyń júrekte saqtalatyn erligi sekildi, máńgilik tiri estelikke aınalady, — dedi soǵys ardageri Olga Savenkonyń nemeresi ıÝlııa Zavadskaıa.
Qart maıdanger Qambar Ámiruly Sársenov alleıa úshin alǵysyn bildiridi.
— Bıyl biz Jeńistiń 80 jyldyǵyn atap ótemiz. Osyndaı alleıany qolǵa alyp, júzege asyrǵany úshin alǵysymyz sheksiz. Bul jerge bizdiń urpaǵymyz kelip, bul aǵashtardy atalary otyrǵyzǵanyn eske alady, — dedi byltyr qazanda 100 jasqa tolǵan ardager Qambar Sársenov.
Osyǵan deıin Erbolat Dosaev ardagerlerdi Jeńis kúnimen quttyqtaǵan bolatyn.