Almatyda skrınıngtik tekserýden ótken 207 adamnan qaterli isik anyqtaldy
Almatyda keıingi jyldary onkologııalyq aýrýdy erte anyqtaý kórsetkishi artyp keledi. Osy jyldyń 9 aıynda bul kórsetkish 38,7%-ǵa ósken. Bul sondaı-aq ótken jyldyń sáıkes kezeńimen salystyrǵanda 6,7%-ǵa ósken. Bul týraly Almaty onkologııalyq ortalyǵynyń dırektory Nursultan Іzmaǵambetov aıtty, dep habarlaıdy Kazinform.
«Sonymen birge keıingi kezeńde (III-IV) kórinetin lokalızatsııada qaterli isikti anyqtaý kórsetkishi tómendeı tústi. Osy jyldyń 9 aıynda bul kórsetkish 6,6% boldy, ótken jyldyń 9 aıynda 6,3% bolǵan. Oǵan maqsatty topty skrınıngtik tekserýmen qamtý arqyly qol jetkizildi ári bul onkologııalyq aýrýdy erte kezeńde anyqtaýǵa múmkindik beredi», - dedi spıker.
Osy jyldyń 9 aıynda Almatyda qaterli isikti erte anyqtaý boıynsha skrınıngtik tekserý jalpy skrınıngtik jospardyń 88,8%-yn qamtydy.
«Skrınıngtik tekserýdiń barysynda 207 qaterli isik, onyń 194-i (93,7%) erte satysynda anyqtaldy. Sondaı-aq 922 naýqasta qaterli isiktiń damý qaýpin týdyratyn isik aldy aýrýy anyqtaldy. Barlyq naýqas ýaqytyly mamandandyrylǵan emmen qamtamasyz etildi. Qaterli isik aýrýyn erte kezeńde anyqtaý tıimdi, tipti tolyq emdeýge de múmkindik beredi», - dedi Nursultan Іzmaǵambetov.
Ol skrınıngtik tekserýden kim jáne qashan óte alatyny týraly aıtty.
«40-70 jas arasyndaǵy áıelder sút bezi obyryna 2 jylda bir ret mammografııalyq skrınıng, 30-70 jas arasyndaǵy áıelder 4 jylda bir ret isik aldy jáne jatyr moıny obyrynyń tsıtologııalyq skrınıngi, 50-70 jas arasyndaǵy erler men áıelder 2 jylda bir ret jasyryn qanǵa test kómegimen kolonoskopııa arqyly toq ishek pen tik ishektiń qaterli isigi men isik aldy aýrýlaryna skrınıngten óte alady», - dep atap ótti Almaty onkologııalyq ortalyǵynyń dırektory Nursultan Іzmaǵambetov.
