Almatyda skrınıngtik tekserý kezinde qansha adamnan qaterli isik anyqtaldy

ALMATY. KAZINFORM – Almatyda qaterli isik skrınınginen ótýge jatatyn turǵyndardyń 99,6%-y qamtyldy. Bul týraly óńirlik kommýnıkatsııalar qyzmetinde ótken baspasóz máslıhaty barysynda Almaty onkologııalyq ortalyǵy dırektorynyń orynbasary Janna Qujaeva aıtty.

«2023 jyldyń qorytyndysy boıynsha qala boıynsha skrınıngtik tekserý josparynyń oryndalýy 99,6%-dy qurady. Onkologter turǵyndardy jatyr moıny, sút bezi jáne toq ishek obyry boıynsha tekserdi. Sonyń ishinde 73 229 áıel jatyr moıny obyryna, 82 944 áıel sút bezi obyryna, 89 923 naýqas toq ishek qaterli isigine skrınıngtik tekserýden ótti», - deıdi ol.

Spıkerdiń sózinshe, skrınıng nátıjesinde onkologııalyq aýrýdyń 298 jaǵdaıy anyqtaldy: 38 – jatyr moıny obyry, sút bezi obyry – 214, toq ishek obyry – 46 jaǵdaı.

«Onkologııalyq aýrý belgileri bar adamdardyń 95,6 paıyzynda (285 jaǵdaıda) qaterli isik erte satysynda anyqtalǵany qýantady. Erte kezeńde anyqtalǵan aýrýdy emdeý jeńilirek, al keıbir jaǵdaıda aýrýdy tolyǵymen jeńýge bolady»,- dedi Janna Qujaeva.