Almatyda syrtqy jarnamaǵa qoıylatyn talaptar ózgeredi

ALMATY. KAZINFORM – Almaty qalasy ákimdigi «syrtqy (kórneki) jarnama obektilerin ornatý qaǵıdalaryn bekitý týraly» qaýlyǵa ózgeris engizý jobasyn Ashyq NQA portalynda jarııalady. 

Atalǵan ózgerister Memleket basshysynyń qolaıly ári estetıkalyq turǵydan tartymdy qalalyq ortany qalyptastyrýǵa, sondaı-aq «Almaty – eshqashan uıyqtamaıtyn qala» tujyrymdamasyn damytýǵa baǵyttalǵan tapsyrmalaryn iske asyrý maqsatynda engizilmek.

– Megapolısterdi damytý úrdisteri qalalyq ınfraqurylym sapasyn arttyrýdy, sáýlettik ortanyń kórneki úılesimdiligin qamtamasyz etýdi, biryńǵaı dızaın-kod qalyptastyrýdy jáne qala turǵyndary men qonaqtary úshin qolaıly jaǵdaı jasaýdy talap etedi. Osyǵan baılanysty qoldanystaǵy talaptardy turaqty damý qaǵıdattaryna sáıkestendirý jáne normatıvtik retteýdi jetildirý qajettiligi týyndap otyr, - delingen jobada.

Usynylyp otyrǵan ózgerister:

– qalalyq ınfraqurylym obektilerine qoıylatyn talaptardy júıeleý;

– qalanyń sáýlettik kelbetiniń estetıkalyq tutastyǵyn qamtamasyz etý;

– shaǵyn jáne orta bıznestiń damýyna qolaıly jaǵdaı jasaý;

– qalanyń ınvestıtsııalyq tartymdylyǵyn arttyrý;

– Almaty qalasynyń zamanaýı ári serpindi damyp kele jatqan megapolıs retindegi ımıdjin nyǵaıtý.

Joba 26 naýryzda jarııalanǵan jáne 10 sáýirge deıin talqylaýda bolady.

Eske salaıyq, 2023 jyly jeltoqsan aıynda Almaty qalasynyń máslıhaty qalanyń dızaın-kodyn bekitti.