Almatyda syrǵymanyń túsýi: Úıindi astynan tórt adam izdestirilip jatyr
ALMATY. KAZINFORM – Almaty ákimi Erbolat Dosaev topyraqtyń laılanýy saldarynan bolǵan tehnogendik sıpattaǵy laı kóshken jerge keldi.
Sol jerde qala basshysy búlingen ǵımarattardy aralap, shuǵyl kóshpeli keńes ótkizdi.
«Negizgi basymdyq – izdeý-qutqarý jumystary. Úıde bolǵan adamdardy izdeý boıynsha jumyldyrylǵan toptyń jumysyn úzdiksiz qamtamasyz etý qajet»,- dedi Erbolat Dosaev.
Kórshilerdiń aıtýynsha, bul úıde 4 adamnan turatyn otbasy bolǵan.
Ákimniń tapsyrmasy boıynsha, bolǵan oqıǵanyń sebepterin tekserý jáne laı kóshkini saldaryn joıý boıynsha arnaıy top quryldy.
Esterińizge sala keteıik, 8 aqpanda Medeý aýdanynyń «Taý Samaly» shaǵyn aýdanyndaǵy Olımpıskıı kóshesi boıynda topyraqtyń laılanýy saldarynan tehnogendik sıpattaǵy laı kóshkini boldy.
