Almatyda sırek metaldardy zertteý ortalyǵy qurylmaq
ASTANA. KAZINFORM – Qasym-Jomart Toqaev birinshi «Ortalyq Azııa – Koreıa Respýblıkasy» sammıtinde asa mańyzdy mıneraldar salasyndaǵy seriktestikti kúsheıtýdi usyndy. Bul týraly Aqordanyń baspasóz qyzmeti habarlady.
— Qazaqstannyń resýrs bazasy aıtarlyqtaı mol. Sırek kezdesetin metaldar qory boıynsha álemdik kóshbasshylardyń qataryna enedi. Koreıa strategııalyq sanatqa jatqyzatyn 10 mıneral túriniń bári de elimizde bar. Qazaqstannyń resýrs áleýeti men Koreıanyń tehnologııalyq múmkindikterin úılestirý ózara tıimdi yntymaqtastyq úshin keń múmkindikterge jol ashady. Osy sapar aıasynda Almaty qalasynda Koreıanyń tehnologııalyq yqpaldastyq ınstıtýtynyń (KIAT) kómegimen Sırek jáne sırek kezdesetin metaldardy zertteý ortalyǵyn qurý týraly ýaǵdalastyqqa qol jetkizildi. Men muny quptaımyn. Biz tolyq óndiris tsıklyn qalyptastyrýdy maqsat etýimiz kerek. Asa mańyzdy shıkizatty zertteý men óndirýden bastap, ony tereń óńdeý jáne odan qosylǵan quny joǵary daıyn ónim shyǵarýǵa deıingi tizbek tolyq qamtylýǵa tıis. Qarapaıym tilmen aıtqanda, jartylaı ótkizgishter, mıkroelektronıka, akkýmýlıator, elektromobıl men robotty tehnıka bólshekterin óndirýge kóshýimiz kerek. Bul mindetti oryndaý úshin birlesken qazaq-koreı kompanııasyn qurýdy usynamyz, — dedi Prezıdent.
Sonymen qatar Qasym-Jomart Toqaev sý qaýipsizdigi jáne aımaqtaǵy ekologııalyq teńgerimdi saqtaý máselesin kóterdi.
— Qazaqstanda sý sharýashylyǵy ınfraqurylymyn jappaı jańǵyrtý júrip jatyr. 2030 jylǵa deıin 42 jańa sý qoımasyn salyp, 14,5 myń shaqyrym sýlandyrý arnalaryn jańartýdy jáne sý únemdeý tehnologııalaryn keńinen qoldanýdy josparlap otyrmyz. Klımattyń ózgerýi, sý tapshylyǵy jáne tabıǵı ekojúıeniń tozýy qazirdiń ózinde Ortalyq Azııanyń áleýmettik-ekonomıkalyq damýyna teris áser etip jatyr. Sondyqtan Qazaqstan Koreıanyń biz úshin óte mańyzdy ári shetin salaǵa qatysty ozyq tehnologııasy men jınaǵan tájirıbesin bólisý nıetin joǵary baǵalaıdy. Atap aıtqanda, Koreıanyń sý únemdeýge, sýdyń tsıfrlyq esebin júrgizýge arnalǵan tehnologııalaryn meńgerýge jáne zamanaýı sý únemdeý ınfraqurylymyn damytýǵa baǵyttalǵan ortaq baǵdarlamany iske qosqan durys dep sanaımyn, — dedi Qazaqstan Prezıdenti.
Aıta ketelik Memleket basshysy elimiz Koreıanyń sýtegi energetıkasyn damytý tájirıbesine qyzyǵýshylyq tanytyp otyrǵanyn atap ótken edi.
