Almatyda sybaılas jemqorlyq táýekelder kartasy aıasynda qandaı buzýshylyqtar anyqtaldy
ALMATY. KAZINFORM - QR Sybaılas jemqorlyqqa qarsy is-qımyl agenttiginiń Almaty qalasy boıynsha departamentiniń basshysy Arman Rahımov megapolıste sybaılas jemqorlyq táýekelderiniń kartasyn júzege asyrý barysyn aıtty.
Spıkerdiń sózinshe, sybaılas jemqorlyq táýekelderiniń aldyn alý úshin kartada qurylys jáne turǵyn úı, ekologııa, jer, kásipkerlik, ekonomıka jáne qarjy, fıskaldyq, áleýmettik, ınfraqurylym jáne joldar, seısmıkalyq qaýipsizdik, jylý elektr stantsııalary, problemalyq qurylys obektileri sııaqty 11 negizgi sala anyqtaldy.
«Sybaılas jemqorlyq táýekelderiniń kartasyn iske asyrý barysynda osy jyldyń 1 toqsanynda seısmologııalyq qaýipsizdik salasynda sybaılas jemqorlyqqa qarsy monıtorıng, sondaı-aq densaýlyq saqtaý, sport jáne áleýmettik qamsyzdandyrý júıelerindegi sybaılas jemqorlyq táýekelderine syrtqy taldaý jumystary júrgizildi», — dedi Arman Rahımov.
Kásipkerlik salasy memlekettik organnyń erekshe baqylaýynda tur. «Bızneske jol» jobasy aıasynda jyl basynan beri 4 kásipkerdiń túıtkildi máselesi sheshimin tapqan. Osylaısha, sybaılas jemqorlyqqa qarsy qyzmetke JShS ókilderi medıtsınalyq buıymdardy satyp alý boıynsha ótkizilgen tenderdiń qorytyndysyna baılanysty shaǵymmen habarlasty. Memlekettik organnyń aralasýynan soń jiberilgen buzýshylyqtar úshin uıymdastyrýshynyń laýazymdy tulǵasy tártiptik jaýapqa tartylyp, shart buzylyp, lottar jańa tender ótkizý jolymen qaıta jarııalandy.
«Taǵy bir jaǵdaıda salyq organy tarapynan kásipkerdiń quqyǵyn buzý faktileri joıyldy. Memlekettik kirister departamenti jeke kásipkerge salyq bereshegin óteý týraly sebepsiz habarlama berdi. Sondaı-aq, jeke kásipkerdiń belsendi kásipkerlik qyzmetiniń toqtaýyna ákelgen shyǵys operatsııalaryn toqtatý týraly hattama shyǵarǵan. Osy fakti boıynsha tıisti sharalardy qoldaný nátıjesinde jeke kásipkerdiń barlyq banktik shottary buǵattan shyǵarylyp, negizsiz eseptelgen salyq bereshegi esepten shyǵaryldy», — dedi spıker.
Sonymen qatar, problemalyq qurylys obektileri salasynda búginde qalada tapsyrý merzimi buzylǵan jáne urlaýdyń yqtımal qaýpi bar 5 áleýmettik, sporttyq jáne kommýnaldyq nysannyń qurylysy qadaǵalanýda. Ótken jyldyń qazan aıynan bastap bul uzaq merzimdi qurylys nysandary basqarma baqylaýyna alyndy.
Fıskaldyq salada Almaty qalasy boıynsha memlekettik kirister departamentiniń kedendik baqylaý basqarmasynyń eki laýazymdy tulǵasy áshkerelenip, olar QR ÁQBtK-niń 677-baby boıynsha (zańsyz materıaldyq syıaqy alý) ákimshilik jaýapqa tartylyp, 3 mln teńge aıyppul salyndy.
Ekonomıka jáne qarjy salasynda «Satyp alýdyń biryńǵaı terezesi» portalynyń monıtorıngi turaqty negizde júzege asyrylady. Monıtorıng nátıjeleri boıynsha І-shi toqsanda 470 mln teńgeden astam bıýdjet qarajatyn utymsyz paıdalanýdyń joly kesildi.
«Qazirgi ýaqytta agenttik „Dárilik zattar men medıtsınalyq maqsattaǵy buıymdardy saraptaý ulttyq ortalyǵy“ ShJQ RMK qyzmetindegi sybaılas jemqorlyq táýekelderine syrtqy taldaý júrgizýde. Onyń barysynda baǵany memlekettik retteý, dárilik zattar men medıtsınalyq maqsattaǵy buıymdardy tirkeý máseleleri, olardyń sapasyna, tıimdiligine jáne qaýipsizdigine qoıylatyn talaptardy saraptaý jáne t. b. saraptamalar júrgiziledi», — dedi Aoman Rahımov.
Sondaı-aq ol búkil respýblıka boıynsha áleýmettik qamsyzdandyrý salasynda keshendi taldaý júrgizilip jatqanyn atap ótti. Taldaý barysynda bıýdjetti josparlaý, jeke kómekshiler qyzmetin qarjylandyrý, ataýly áleýmettik kómekti tóleý, kásiptik oqytýǵa aqshany jumsaý, kásipkerlikti damytýǵa granttardy bólý, sondaı-aq eńbekaqy qoryn ıgerý máseleleri qarastyrylady.
