Almatyda ishimdik satatyn orynǵa aınalyp ketken Ulttyq ýnıversıtet ǵımaraty qalaı qaıtaryldy

ALMATY. KAZINFORM — Almatyda 30 jyldan astam ýaqyt buryn zańsyz ıelikten shyǵarylǵan Abaı atyndaǵy QazUPÝ úı-jaıy memleketke qaıtaryldy.

Medeý aýdanynyń prokýratýrasy 208 sharshy metr bolatyn nysan qalaı jekemenshikke ótip ketkenin jáne ony qaıtarý jumystary qalaı júrgenin túsindirdi.

Quqyq qorǵaý organy Abaı atyndaǵy Qazaq ulttyq pedagogıkalyq ýnıversıteti rektorynyń ótinishi negizinde Qonaev kóshesi, 80-úı mekenjaıynda ornalasqan nysanǵa baılanysty tekserý júrgizgen. Taldaý barysynda ýnıversıtettiń qajettilikterine arnalǵan jyljymaıtyn múlik ózara baılanysy bar tulǵalarǵa zańsyz berilip, alkogol ónimderin satatyn orynǵa aınalǵanyn anyqtaǵan.

— 1995 jyly ýnıversıtettiń burynǵy basshylyǵy memlekettik múlikti quzyrly organdardyń qatysýynsyz, konkýrs nemese aýktsıon ótkizbesten, tómendetilgen qunmen jekemenshik kompanııaǵa bergen. Keıinnen jer telimi de jer zańnamasynyń talaptaryn buza otyryp memlekettik menshikten shyǵarylǵan. Nysan birneshe ret burynǵy rektordyń otbasy múshelerimen baılanysty tulǵalar arasynda qaıta satylyp, keıin syıǵa tartý sharttary arqyly onyń jaqyn týystarynyń ıeligine ótken. Osylaısha, ýnıversıtet múlki is júzinde affılırlengen tulǵalardyń paıdasyna berilgen, — dep túsindirdi aýdandyq prokýratýradan.

Sondyqtan prokýratýra bastapqy zańsyz mámilelerdi jáne odan keıingi sharttardy jaramsyz dep taný týraly sotqa talap-aryz engizdi. Medeý aýdandyq sotynyń 2025 jylǵy 16 sáýirdegi sheshimimen prokýratýranyń talap-aryzy ishinara qanaǵattandyryldy. Almaty qalalyq sotynyń azamattyq ister jónindegi sot alqasynyń 2025 jylǵy 3 qyrkúıektegi qaýlysymen talap-aryz tolyq kólemde qanaǵattandyryldy. Kassatsııalyq saty sot aktilerin ózgerissiz qaldyrdy.

— Osylaısha, memleket múddeleri qorǵalyp, jyljymaıtyn múlik ýnıversıtetke qaıtaryldy, — dep naqtylady quqyq qorǵaý organy.

Eske salaıyq, buǵan deıin Almaty prokýratýrasy zańsyz jekeshelendirilgen JOO nysanyn memleketke qaıtarǵanyn jazǵanbyz.