Almatyda shırek ǵasyr ómir súrgen Han esimdi kerik kóz jumdy

ASTANA. KAZINFORM - Boıy bes metrge jýyq qart janýar qaladaǵy zoobaqta 25 jyl ómir súrdi (adam ómirimen eseptegende, bul 95 jasqa teń). Jalpy jabaıy tabıǵatta kerikter shamamen 20 jyl ómir súredi jáne bul jastan asatyndary sırek kezdesedi.

Han Almaty haıýanattar baǵyna Ońtústik Afrıka Respýblıkasynan ákelingen. Ol jergilikti aýa-raıyna, osyndaǵy ortaǵa tez beıimdelip, kelýshilerdiń súıikti janýaryna aınaldy. Shırek ǵasyr ishinde Almaty zoobaǵynda Hannyń 12 urpaǵy dúnıege keldi. Qazir Hannan týǵan Batyr, Hanzada jáne Sultan atty kishkentaı kerikter zoobaq qyzmetkerleriniń qamqorlyǵynda jáne kelýshilerdi qýantyp júr. Al Hannyń basqa qulyndary Máskeý, Krasnodar ólkesi, Shymkent, Tashkent, Aqtóbe, Ferǵana haıýanattar baǵyna berilgen.

Han – jaǵymdy ári jumsaq minezimen, erekshe kórkimen eń tanymal jáne súıkimdi janýarlarymyzdyń biri boldy, sondaı-aq zoobaq qyzmetkerleriniń jáne barsha kelýshilerdiń esinde qalady.

Han sońǵy kezderi ózin sergek sezinip júrdi, tábeti de jaqsy boldy. Jem-shóbin de tolyq jep taýysatyn.

Biraq, qarttyǵyna baılanysty azdap býyndary aýyratyn.

«Han keshkisin óte belsendi boldy. Ózine berilgen jem-shóbin taýysyp jedi. Azdap aqsap júretin. Tańǵa jýyq ol jerge jatyp qaldy. Ádette, kerikter tolyq denesimen jerge jatpaıdy. Kerik úshin 25 jas – adamnyń 95 jasyndaı bolady. Biz ony bárimiz jaqsy kórdik, kelýshiler de ony jaqsy kóretin. Uzaq jyldar boıy Hanǵa qamqorlyq kórsetip, kútim jasaǵan barlyq qyzmetkerlerge alǵys aıtamyz» – dedi, «Tuıaqty janýarlar» sektsııasynyń meńgerýshisi Balabek Mahatov.

Táýelsiz patologoanatom maman, Qazaq ulttyq agrarlyq zertteý ýnıversıtetiniń professory Amangeldi Máýlanov Hannyń jalpy jaǵdaıy jaqsy bolǵanyn, onyń boıynda ınfektsııalyq jáne baqsa da qaterli dert bolmaǵanyn aıtty.

«Keriktiń óliminiń sebebi – qartaıǵan jasqa baılanysty qaıtymsyz ózgerister ıaǵnı bıologııalyq qartaıý» dedi ol.

Aıta keteıik, buǵan deıin osy baqta Tom esimdi aq aıý qaterli isikten kóz jumdy.