Almatyda sheteldikterge qazaqstandyq kýálik jasap júrgen azamat ustaldy

ALMATY. KAZINFORM – Almatyda jalǵan qujat jasaýdy kásipke aınaldyrǵan 32 jastaǵy turǵyn ustaldy.

o
Foto: Almaty qalasy PD

Qalalyq polıtsııa departamentiniń málimetinshe, ózge tulǵalardyń málimetin jamylyp jumys istegisi kelgenderge jeke kýálik, júrgizýshi kýáligi men kóliktiń tehnıkalyq pasportynan turatyn daıyn qujattar jıyntyǵyn jasap berip júrgen azamat ustaldy. Zańsyz kásipti jolǵa qoıǵan kúdiktini Krımınaldyq polıtsııa qyzmetkerleri qolǵa túsirgen.

Ol aqyǵa Qazaqstan azamattarynyń qoldanystaǵy JSN men kýálik nómirlerin paıdalana otyryp, jalǵan qujattar daıyndaǵan. Tek sýreti men derbes málimetterin aýystyryp otyrǵan. Mundaı qýlyq tapsyrys berýshilerge aty-jónin jasyryp, jetkizý servısteri men jolaýshy tasymaldaý qosymshalaryna tirkelýge múmkindik bergen.

- Aldyn ala derekter boıynsha negizgi tapsyrys berýshiler Ortalyq jáne Ońtústik Azııa elderinen kelgen azamattar bolǵan. Olar jasandy qujattardy negizinen kýrer nemese júrgizýshi bolyp jumysqa ornalasý úshin paıdalanǵan. Jedel izdestirý sharalary barysynda kúdikti qolǵa tústi. Onyń keńsesin tintkileý kezinde jalǵan qujat jasaýǵa paıdalanyldy degen kúdikpen kompıýterlik tehnıka men uıaly telefon tárkilenip, saraptamaǵa jiberildi, - dep habarlady departamentten.

Odan bólek polıtsııa onyń bul áreketterine zańsyz mıgratsııany uıymdastyrý baby boıynsha quqyqtyq baǵa berý máselesin qarastyryp jatyr.

Eske salaıyq, buǵan deıin Almaty oblysynda polıtseıler kólikti toqtatý úshin qarý qoldandy.