Almatyda sheteldik taksı júrgizýshileri 217 ret jol erejesin buzǵan
Almatyda jolaýshylar tasymalymen zańsyz aınalysatyn sheteldikter izdestirilip jatyr, dep habarlaıdy Kazinform.
Profılaktıkalyq is-shara bastalǵaly beri sheteldikter 217 márte jol erejesin buzǵany anyqtaldy. Onyń ishinde Tájikstan azamattary 44 ret jol erejesin buzǵan. Bul týraly Almaty qalalyq polıtsııa departamentiniń jergilikti polıtsııa qyzmeti basqarmasy bastyǵynyń orynbasary, polıtsııa polkovnıgi Dıas Dýanbekov aıtty.
«Mamandandyrylǵan aıyppul turaǵyna 79 avtokólik qoıyldy. Sheteldikterdiń jeke tasymaldaý qyzmetin kórsetý derekterin anyqtaýǵa erekshe nazar aýdaryldy. Sońǵy táýlikte osyǵan uqsas 3 derek anyqtaldy. Tájikstan azamattary mobıldi resýrs arqyly zańsyz jolaýshylar tasymalymen aınalysqan. Quqyqbuzýshylyqtyń bolý sebepteri men sharttaryn joıý jóninde atalǵan JShS-ǵa usynys engizildi», — dedi ol.
Sondaı-aq polıtsııanyń málimetinshe, sheteldik jumys kúshin zańsyz tartqany úshin qalalyq taksoparkterdiń biriniń basshylyǵy ákimshilik jaýapqa tartyldy.
«Jergilikti polıtsııa qyzmetiniń ókilderi óz quzyretine sáıkes anyqtalǵan zań buzýshylyqtar boıynsha materıaldardy Almaty qalasynyń kóliktik baqylaý ınspektsııasyna jiberdi», — dep habarlady qalalyq polıtsııa departamentiniń baspasóz qyzmeti.
